पिंपरी-चिंचवड : एका मद्यधुंद अवस्थेतील कंटेनर चालकाने कहरच केला. पिंपरी चिंचवड महापालिकेसमोर या चालकाने कंटेनर सुसाट वेगाने थेट बीआरटी मार्गात घुसवला, तो ही विरुद्ध दिशेने… या प्रकारामुळे सर्वांचाच जीव टांगणीला लागला. रागाच्या भरात त्याने कंटेनर मागे घेण्यासही नकार दिला. अखेर या नशेबाज कंटेनरचालकासमोर सगळ्यांनीच हात टेकले. कंटेनरला जाण्यासाठी रिव्हर्स गाड्या घेऊन जागा दिली.
पिंपरी-चिंचवड चौकात ही थरारक घटना घडली. कंटेनरचालकाने थेट कंटेनर बीआरटी मार्गात विरुद्ध दिशेने घुसवला. त्याचवेळी समोरून चारचाकी आणि पीएमपीएमएलच्या बस येत होत्या. कंटेनर चालक मद्यधुंद अवस्थेत होता, तो कोणाचेचं ऐकायच्या मनस्थितीत होता. अखेर त्याने कंटेनर जागेवर थांबवला. कंटेनर रिव्हर्स घेण्यासाठी त्याला सर्वांनीच विनवणी केली. पण तो अडून बसला.
अखेर मद्यधुंद चालकासमोर सर्वांनीच हात टेकले. कंटेनर समोर उभी असलेली कार आणि बस चालकांनी रिव्हर्स घेतली. त्यानंतर कंटेनर चालक सुसाट निघाला. बेधुंद अवस्थेत असणाऱ्या चालकाने आधी नेहमी प्रवाशांची रेलचेल असणाऱ्या पीएमपीएमएल बस स्टॉपला ठोकर दिली, मग बीआरटी मार्गाचे बॅरिगेट तोडले. सुदैवाने यात कोणतीही हानी झाली नाही. रात्री साडे दहाच्या सुमारास ही घटना घडली. पोलिसांकडून या चालकाचा शोध सुरू आहे.
मद्यधुंद अवस्थेतील चालकांमुळे असे प्रकार सातत्याने पुढे येत आहेत. चालकांच्या या मुजोरीमुळे अनेकांचा जीव टांगणीला लागतो. अनेक नागरिकांनी या चालकावर कारवाईची मागणी केली आहे.
