अक्षय मंडलिक
Pune News : पुण्यातून ‘फुफ्फुस प्रत्यारोपणासाठी निघालेल्या रुग्णवाहिकेचाच अपघात झाल्याची घटना समोर येत आहे. पुण्यातील डी.वाय. पाटील रुग्णालयातून चेन्नईसाठी फुफ्फुस प्रत्यारोपणासाठी निघालेली रुग्णवाहिका थेट दुभाजकाला धडकली. या अपघातात डॉक्टर आणि पथक गंभीर जखमी झाले होते.
मात्र, स्वतःच्या जीवाची पर्वा ना करता अपोलो हॉस्पिटलचे फुफ्फुस प्रत्यारोपणतज्ज्ञ डॉ. संजीव जाधव जखमी अवस्थेत विलंब न करता शीतपेटीतील फुफ्फुस घेऊन मोटारीने लोहगाव विमानतळावर पोहचले. तेथे एअर ॲम्बुलन्स तयार होती. त्यामधून ते चेन्नईला पोहचून रुग्णालवर फुफ्फुस प्रत्यारोपणाची यशस्वी शस्त्रक्रिया करून चाळीस वर्षाच्या रुग्णाला जीवनदान दिलं.
अधिक माहिती अशी की, चेन्नई येथील एका रुग्णालयात चाळीस वर्षाचे रूग्ण फुफ्फुस प्रत्यारोपणासाठी प्रतिक्षेत होते. दरम्यान, मुंबई येथील अपोलो हॉस्पिटलच्या पथकाला पिंपरीतील डी.वाय. पाटील रुग्णालयात आत्महत्या केलेल्या युवकाचे फुफ्फुस चांगल्या स्थितीत असल्याची माहिती मिळाली.
त्यामुळे अपोलो हॉस्पिटलचे फुफ्फुस प्रत्यारोपणतज्ज्ञ डॉ. जाधव आणि त्यांचे पथक २० नोव्हेंबरला सायंकाळी डी.वाय. पाटील रुग्णालयातून ‘फुफ्फुस’ घेऊन रुग्णवाहिकेतून लोहगाव विमानतळाकडे जात असताना बोपोडी येथे रुग्णवाहिका दुभाजकाला धडकल्यामुळे मोठा अपघात झाला. या अपघातात डॉ. संजीव जाधव यांच्यासह पथक गंभीर जखमी झाले होते. पण चेन्नई येथील रुग्णालयात रुग्णाच्या फुफ्फुस प्रत्यारोपणाची शस्त्रक्रिया सुरू करण्यात आली होती.
त्यामुळे उशीर न करता डॉ. जाधव शीतपेटीतील फुफ्फुस घेऊन मोटारीने लोहगाव विमानतळावर पोहचले. नंतर तेथून एअर ॲम्बुलन्समधून ते चेन्नईला पोहचून ४० वर्षाच्या रुग्णावर फुफ्फुस प्रत्यारोपणाची यशस्वी शस्त्रक्रिया करून त्यानां जीवनदान दिले.
