पुणे: ससून सर्वोपचार रुग्णालयात सध्या वैद्यकीय अधीक्षक पदाची ‘संगीत खुर्ची’ खेळ सुरू आहे. विद्यमान अधीक्षक डॉ. किरणकुमार जाधव यांना हटवून आता त्यांच्या जागी डॉ.अजय तावरे यांची नियुक्ती करण्यात आली आहे. यामुळे गेल्या सहा महिन्यांत चौथा अधीक्षक नेमण्याचा विक्रम रुग्णालय प्रशासनाने आपल्या नावावर केला. विशेष म्हणजे अधिष्ठातापदाचा कार्यभार डॉ.विनायक काळे यांनी स्वीकारल्यानंतर अवघ्या महिनाभरातच त्यांनी अधीक्षक बदलण्याचे पाऊल मोठे उचलले आहे.
ससूनच्या वैद्यकीय अध्यक्षपदी मे महिन्यात डॉ. यल्लपा जाधव यांची नियुक्ती झाली होती. त्यानंतर ऑगस्टमध्ये त्यांना पदावरून हटवत डॉ. सुनील भामरे यांच्याकडे ही जबाबदारी देण्यात आली. लगेच सप्टेंबरमध्ये डॉ.किरणकुमार जाधव यांची नियुक्ती करण्यात आली. डॉ. जाधव यांनी रुग्णालयाच्या प्रशासनातील गोंधळ दूर करीत कामात सुसूत्रता आणली होती. याचबरोबर त्यांनी अधिकाऱ्यांसह कर्मचाऱ्यांबाबत शिस्तीचे पाऊल उचलले होते. याबद्दलही अनेक जण त्यांच्यावर नाराज होते, अशी चर्चा आहे.
डॉ.अजय तावरे हे यापूर्वीही अधीक्षकपदी होते. मूत्रपिंड प्रत्यारोपण फसवणूक प्रकरणी डॉ. तावरे यांची मागील वर्षी एप्रिलमध्ये अधीक्षक पदावरून उचलबांगडी करण्यात आली होती. त्यांची या प्रकरणी विभागीय चौकशी देखील करण्यात आली होती. याचबरोबर डॉ. तावरे हे न्यायवैद्यक विभागाचे प्रमुख आहेत. त्यांच्याकडे एक पूर्णवेळ जबाबदारी असताना आता वैद्यकीय अधीक्षकपदाची जबाबदारी आता देण्यात आली आहे.
आदेश निघण्याआधीच पदभार स्वीकारला?
वैद्यकीय अधीक्षकपदी डॉ.तावरे यांची नियुक्ती करण्याचा आदेश अधिष्ठाता डॉ. विनायक काळे यांनी शुक्रवारी (ता.२९) काढला. मात्र, डॉ. तावरे यांनी या पदाचा कार्यभार त्याआधीच गुरुवारी (ता.२८) रात्री उशिरा स्वीकारला. विशेष म्हणजे डॉ. जाधव यांच्या अनुपस्थितीत त्यांनी हा पदभार स्वीकारला, अशी चर्चा ससूनमध्ये रंगली आहे.
