शिरूर: पुण्यात शेततळ्यात बुडून अनेकांचा दुर्दैवी मृत्यू झाला. या घटनांमुळे पुन्हा एकदा शेततळ्यांच्या सुरक्षेचा गंभीर प्रश्न समोर आला आहे. सरकारने शेतीसाठी पाण्याची साठवणूक व्हावी यासाठी शेतकऱ्यांना शेततळी बांधण्यास प्रोत्साहन दिले आहे. परंतु ही शेततळी धोकादायक बनले आहे. योग्य सुरक्षा व्यवस्था न केल्यामुळे हीच शेततळी आज निष्पाप जीवांचे बळी घेत आहेत. राज्यामध्ये अशा घटनांची वाढती संख्या पाहता, ही शेततळी वरदान नव्हे, तर ‘मृत्यूचे सापळे’ बनत आहेत, हे दुर्दैवाने सिद्ध होत आहे. आश्चर्याची बाब म्हणजे सबंधित विभाग या गंभीर समस्येकडे दुर्लक्ष करत आहेत.
अशा घटना टाळण्यासाठी तातडीने कठोर उपाययोजना करणे आवश्यक आहे. सरकारने ज्या शेतकऱ्यांनी शेततळ्याभोवती सुरक्षा व्यवस्था केली असेल, त्यांनाच अनुदान द्यावे. सर्वात महत्त्वाचे म्हणजे, जर सुरक्षिततेची काळजी न घेतल्यामुळे जीवितहानी झाली, तर संबंधित शेतकऱ्यावर कठोर कारवाई करावी. प्रत्येक शेततळ्याभोवती सुरक्षा कुंपण उभारणे बंधनकारक करावे. तसेच, तळ्यात दोरी, ट्यूब किंवा इतर तरंगणारी साधने उपलब्ध असावीत. या उपाय योजना केल्यास अनेक जीव वाचतील.
शेततळ्यांची खोली साधारणपणे 10 फूट (3 मीटर) असते, तळाशी असलेल्या प्लास्टिकमुळे काठांवर शेवाळ साचते, ज्यामुळे पाय घसरण्याची शक्यता वाढते. एकदा तळ्यात पडल्यास बाहेर येणे खूप अवघड होते. ज्यामुळे राज्यात सातत्याने शेततळ्यात पडून अनेकांचा मृत्यू होत आहे.
