संदीप टुले :
Daund Mansoon News : दौंड, (पुणे) : गेल्या काही दिवसांपासून दडी मारून बसलेल्या वरुणराजाने शनिवारपासून दौंड तालुक्यातील काही भागांमध्ये जोरदार हजेरी लावली. नागरिक आणि बळीराजा जून महिना लागला की वरुणराजाची वाट पाहतात. मात्र, यावर्षी वरुणराजाने दडी मारल्यामुळे महाराष्ट्रातील शेतकरी मोठ्या चिंतेत पडलेला दिसत होता. पण आता बळीराजा सुखावला आहे.
पावसाने दडी मारल्याने शेतातील मशागतीची कामे करून पेरणी करण्यासाठी वरुणराजाची वाट पाहत असलेल्या बळीराजाची प्रतीक्षा आता संपली असून, गेल्या दोन ते तीन दिवसांत दौंड तालुक्यातील वातावरण ढगाळलेले असताना २४ आणि २५ जून रोजी दौंड तालुक्यातील काही भागांमध्ये वरुणराजाने हजेरी लावली तर काही भागांमध्ये मुसळधार पाऊस पडला.
गेल्या दोन-तीन दिवसात बदलेल्या वातावरणामुळे उष्णता कमी झाल्याने उन्हामुळे होणारा उकाड्याचा त्रासही कमी झाला आहे. वरुणराजाने हजेरी लावल्याने बळीराजा सुखावल्याचे दिसते.
