पुणे: दौंड (Daund) तालुक्याला दरवर्षी उन्हाळ्यात पाण्याच्या तीव्र टंचाईचा सामना करावा लागतो. केंद्र आणि राज्य सरकारने जलजीवन मिशनसारख्या (Jal Jeevan Mission) महत्त्वाकांक्षी योजनांवर कोट्यवधी रुपये खर्च केले असले, तरी आजही अनेक गावांना पिण्याच्या पाण्यासाठी टँकरवर अवलंबून राहावे लागत आहे. पाणी मिळत नसल्यामुळे अनेक गावांमध्ये आजही महिलांना आणि मुलींना लांबून पाणी आणण्याची वेळ येते. टँकरने पाणीपुरवठा करणे हा तात्पुरता उपाय आहे, ज्यामुळे ग्रामपंचायतींना दरवर्षी लाखो रुपयांचा खर्च करावा लागतो. टँकर वेळेवर न आल्यास गावात गोंधळ होतो आणि पाण्याचे राजकारणही सुरू होते.

कोट्यवधी रुपयांचा खर्च, तरी पाणी नाही
मागील काही वर्षांत दौंड तालुक्यात अनेक गावांमध्ये जलजीवन मिशन अंतर्गत नवीन जलवाहिनी टाकण्यात आली, तर काही ठिकाणी जलशुद्धीकरण केंद्रेही उभारली गेली. यामुळे गावकऱ्यांना ‘आता रोज नळाला पाणी येईल’ अशी आशा निर्माण झाली होती. मात्र, तांत्रिक अडचणी आणि व्यवस्थापनातील त्रुटींमुळे ही स्वप्ने अपूर्णच राहिली आहेत. अनेक ठिकाणी जलवाहिनी टाकली आहे, पण पंप सुरू नाहीत. वीजपुरवठा खंडित झाल्याने पंप बंद पडतात आणि गळतीमुळे लाखो लिटर पाणी वाया जाते.

टँकरवरच अवलंबित्व
दौंड तालुक्याची वाढती लोकसंख्या आणि औद्योगिकरणामुळे पाण्याची गरज दिवसेंदिवस वाढत आहे. त्यामुळे पावसाच्या पाण्याचे संवर्धन करण्याचे प्रकल्प वाढवणे, पाणी नियमित येण्यासाठी उपाययोजना करणे आवश्यक आहे, असे तज्ज्ञांचे मत आहे.







