Crime News: अहिल्यानगर : अहिल्यानगर जिल्ह्यातील घारगाव परिसरात गुरु-शिष्याच्या पवित्र नात्याला काळिमा फासणारी घटना उघडकीस आली आहे. एका खासगी शाळेत शिकवणाऱ्या शिक्षकाने आपल्याच शाळेतील आठवीतील अल्पवयीन विद्यार्थिनीवर वारंवार अत्याचार केल्याचा धक्कादायक प्रकार समोर आला आहे. पीडित मुलगी गर्भवती असल्याचे वैद्यकीय तपासणीत स्पष्ट झाल्यानंतर हा सर्व घृणास्पद प्रकार उघड झाला असून परिसरात मोठी खळबळ उडाली आहे. (Crime News)
मिळालेल्या माहितीनुसार, संबंधित पीडित मुलगी एका माध्यमिक शाळेत शिक्षण घेत आहे. घरच्या ओढग्रस्त परिस्थितीमुळे ती नेहमी मानसिक दडपणाखाली असायची. तिचे वडील कामासाठी बाहेर असायचे, तर आई आणि भाऊ आपापल्या कामात व्यस्त असायचे. मुलीच्या याच एकाकीपणाचा आणि मानसिक अवस्थेचा फायदा आरोपी शिक्षक अमोल बाबासाहेब भोसले याने घेतला. आरोपीचे वय २३ वर्ष असून तो संगमनेर येथील रहिवासी आहे. मुलगी सातवीत असल्यापासूनच त्याने तिच्याशी जवळीक साधण्यास सुरुवात केली होती. तिला भावनिक आधार देण्याचे नाटक करून त्याने तिच्या आईच्या मोबाईलवर प्रेमाचे संदेश पाठवून तिचा विश्वास संपादन केला.
डिसेंबर २०२४ ते जानेवारी २०२६ या प्रदीर्घ काळात हा अत्याचाराचा सिलसिला सुरू होता. जेव्हा मुलगी घरी एकटी असायची, तेव्हा आरोपी तिच्या घरी जाऊन तिच्यावर जबरदस्ती करायचा. गेल्या दोन वर्षांपासून हा प्रकार सुरू होता, मात्र कोणालाही याची पुसटशी शंका आली नाही. काही दिवसांपूर्वी मुलीला अचानक पोटदुखीचा त्रास सुरू झाला, म्हणून तिला पिंपरी चिंचवड येथील रुग्णालयात दाखल करण्यात आले. तिथे डॉक्टरांनी तपासणी केली असता ती गर्भवती असल्याचे निष्पन्न झाले. घटनेचे गांभीर्य ओळखून डॉक्टरांनी पोलिसांना पाचारण केले आणि हा धक्कादायक प्रकार चव्हाट्यावर आला.
याप्रकरणी पोलिसांनी तातडीने पावले उचलत आरोपी अमोल भोसले याच्यावर भारतीय न्यायसंहिता आणि पोक्सो कायद्यांतर्गत गुन्हा दाखल केला आहे. सुरुवातीला झिरो क्रमांकाने नोंदवलेला हा गुन्हा पुढील कारवाईसाठी घारगाव पोलिसांकडे सोपवण्यात आला. घारगाव पोलिसांनी त्वरित तपास चक्रे फिरवून नराधम शिक्षकाला बेड्या ठोकल्या आहेत. या घटनेमुळे शैक्षणिक क्षेत्रात संतापाची लाट पसरली असून पोलीस पुढील तपास करत आहेत.
