Crime News : पुण्यातील आंबेगाव परिसरात घडलेल्या एका थरारक हत्याकांडाने संपूर्ण नांदेड जिल्हा हादरला आहे. आपल्या बहिणीचे प्रेमप्रकरण अमान्य असलेल्या एका भावाने रागाच्या भरात टोकाचे पाऊल उचलत प्रियकराचा निर्घृण खून केला. पुण्यात रक्ताचा खेळ खेळून आरोपी नांदेडमध्ये सुरक्षित असल्याच्या थाटात वावरत होते, मात्र पोलिसांनी अत्यंत शिताफीने सापळा रचून त्यांच्या मुसक्या आवळल्या आहेत.

नेमका काय होता प्रकार?
मिळालेल्या माहितीनुसार, मूळचे भोकर येथील रहिवासी असलेले संदीप भुरके आणि मृत जावेद पठाण हे दोघेही पुण्यात व्यवसायानिमित्त वास्तव्यास होते. जावेद हा पुण्याच्या आंबेगाव येथील एका वॉशिंग सेंटरमध्ये कामाला होता. यादरम्यान त्याचे संदीपच्या बहिणीशी प्रेमसंबंध जुळले. दोघेही पुण्यात एकत्र राहत असल्याची कुणकुण संदीपला लागली आणि त्याच्या संतापाचा कडेलोट झाला.
बहिणीच्या या नात्याचा राग मनात धरून संदीपने आपला मित्र ओमप्रकाश किरकण याला सोबत घेऊन जावेदचा ‘काटा’ काढण्याचा प्लॅन रचला. २२ डिसेंबर रोजी या दोघांनी धारदार शस्त्राने जावेदवर हल्ला चढवून त्याची जीवनयात्रा संपवली.
असा झाला आरोपींचा पर्दाफाश
हत्येनंतर आरोपी पुण्यातून पसार होऊन थेट नांदेड गाठले. पुणे पोलीस त्यांचा माग काढत भोकरपर्यंत पोहोचले, मात्र आरोपी वारंवार आपली ठिकाणे बदलत होते. अखेर, ते नांदेडजवळील वाजेगाव परिसरात असल्याची खात्रीशीर माहिती नांदेड ग्रामीण पोलिसांना मिळाली. पोलीस निरीक्षक ओमकांत चिंचोलकर यांच्या मार्गदर्शनाखाली पोलिसांनी वाजेगाव परिसरात वेढा टाकला आणि आरोपी संदीप भुरके व ओमप्रकाश किरकण या दोघांना बेड्या ठोकल्या. बहिणीच्या प्रेमाचा सूड घेण्याच्या नादात आता भावाला तुरुंगाची हवा खावी लागणार आहे..








