पुणे : जेसीबी यंत्राखाली सापडून झोपेत असलेल्या बांधकाम मजुराचा मृत्यू झाल्याची धक्कादायक घटना घडली आहे. ही घटना धनकवडी या परिसरात घडली आहे. चालकाविरुद्ध सहकारनगर पोलीस ठाण्यात सदोष मनुष्यवधाचा गुन्हा दाखल करण्यात आला आहे.
राहुल भुरेलाल जाधव (वय-18) असे मृत्यूमुखी पडलेल्या तरुणाचे नाव आहे. तर मुकेश यादव (वय-27) असे जेसीबी चालकाचे नाव आहे.
या घटनेसंदर्भात मिळालेल्या माहितीनुसार, धनकवडी परिसरामध्ये ऑक्टोबर महिन्यात बांधकाम सुरु होते. त्यावेळी मजुर राहुल जाधव हा जेसीबीच्या यंत्राखाली झोपला होता. मजुर जेसीबी यंत्राखाली झोपलेला चालकाच्या लक्षात आले नाही. चालकाने राडारोडा उचलण्यासाठी जेसीबी यंत्राची लोखंडी बकेट वरच्या बाजूला उचलली होती. त्यावेळी ती लोखंडी बकेट पुन्हा खाली जाधवच्या पोटावर आदळून तो गंभीर जखमी झाला. त्याचा रुग्णालयात उपचारादरम्यान मृत्यू झाला.
याबाबत पोलीस हवालदार हेमंत राऊत यांनी फिर्याद दिली आहे. पोलीसांच्या चैौकशीत जेसीबी चालकाच्या बेजबाबदारपणामुळे ही दुर्घटना घडल्याची माहिती समोर आली आहे. या प्रकरणाचा पुढील तपास पोलीस करत आहे.
