पुणे : पुण्याचे माजी पोलीस आयुक्त अमिताभ गुप्ता यांच्याशी संबंधित एक मोठी अपडेट समोर येत आहे. माजी पोलीस आयुक्त अमिताभ गुप्ता यांची लाचलुचपत प्रतिबंधक विभाग म्हणजेच एसीबीकडून त्यांच्या मालमत्तेची प्राथमिक चौकशी करण्यात आली आहे. या बाबत पुण्यातील भाजपचे पदाधिकारी सुधीर आल्हाट यांनी आरोप आणि तक्रार केली होती. त्यानंतर एसीबीकडून त्यांच्या मालमत्तेची प्राथमिक चौकशी करण्यात आली आहे.
या प्रकरणाबाबत अधिक माहिती अशी की, सुधीर आल्हाट हे पुण्यातील भाजपचे पदाधिकारी आहेत. त्यांनी पुण्याचे माजी पोलीस आयुक्त अमिताभ गुप्ता यांच्यावर आरोप करून तक्रार केली होती. आता प्राथमिक चौकशीमध्ये तथ्य आढळल्यामुळे लाचलुचपत प्रतिबंधक विभागाच्या महासंचालकांकडे अमिताभ गुप्ता यांच्या चौकशीसाठी अर्ज करून परवानगी मागितल्याचे समोर आले आहे.
अमिताभ गुप्ता विरुद्ध सुधीर आल्हाट: शिवाजी सहकारी बँकेतील घोटाळा प्रकरणात अमिताभ गुप्ता यांच्या सूचनेवरून सुधीर आल्हाट यांना अटक..
मिळालेल्या माहितीनुसार, अमिताभ गुप्ता यांचा मुंबईतील सांताक्रुझमध्ये पंचतारांकित फ्लॅट असल्याचे समोर आले आहे. तसेच पुण्यातील प्रसिद्ध अॅमनोरा टॉवरमध्ये अमिताभ गुप्ता यांचा आलिशान व्हिला असल्याचे उघडकीस आले आहे. या प्रकरणातील तक्रारदार सुधीर आल्हाट हे पुण्यातील भाजपचे पदाधिकारी आहेत. अमिताभ गुप्ता यांच्या सूचनेनुसार आल्हाट यांना शिवाजी सहकारी बँकेतील घोटाळा प्रकरणात अटक झाली होती. बँक घोटाळ्याप्रकरणी आल्हाट काही महिने तुरुंगात होते. तुरुंगातून बाहेर आल्यावर आल्हाट यांनी अमिताभ गुप्तांबद्दल (आर टी आय अंतर्गत) म्हणजेच माहितीच्या अधिकाराचा वापर करून त्यांच्याबद्दलची माहिती मागितली होती. यामध्ये उघड झालेल्या माहितीनुसार अमिताभ गुप्ता यांच्या पुणे आणि मुंबई स्थित असलेली मालमत्ता उघड झाली आहे.
आता याच प्रकरणात त्यांच्या बाबत प्राथमिक चौकशीमध्ये तथ्य आढळल्यामुळे लाचलुचपत प्रतिबंधक विभागाच्या महासंचालकांकडे अमिताभ गुप्ता यांच्या चौकशीसाठी अर्ज करून परवानगी मागितल्याचे समोर आले आहे.
