विशाल शिंदे
नसरापूर: भोर तालुक्यातील (Bhor News) नसरापूर-माळेगाव परिसरात (Pune News) संध्याकाळी काम सुरू असताना अचानक बिबट्याचे दर्शन झाल्याने परिसरात एकच खळबळ उडाली. जेसीबी मशीनने मातीचे काम सुरू असताना कामगाराला समोर हालचाल जाणवली आणि लक्ष गेलं तर काही अंतरावर झाडांच्या आडून बिबट्या बाहेर येताना दिसला.
अचानक झालेल्या या घटनेमुळे कामगार काही क्षण स्तब्ध झाला. त्याने तत्काळ मशीन थांबवून इतरांना सावध केले. काही काळासाठी काम बंद ठेवण्यात आले असून घटनेची माहिती वनविभागाला देण्यात आली आहे. स्थानिक नागरिकांच्या मते, गेल्या काही दिवसांपासून या भागात कुत्रे व शेळ्या बेपत्ता होण्याच्या घटना वाढल्या होत्या. त्यामुळे परिसरात बिबट्या फिरत असल्याची चर्चा आधीपासूनच सुरू होती.
वनविभागाच्या पथकाने घटनास्थळी पाहणी करून बिबट्याच्या हालचालींचा मागोवा घेण्यासाठी प्रक्रिया सुरू केली आहे. नागरिकांना रात्रीच्या वेळी अनावश्यक फिरणे टाळण्याचे आणि जनावरांची योग्य काळजी घेण्याचे आवाहन करण्यात आले आहे.
घटना संध्याकाळी साडेसात ते साडेआठच्या सुमारास घडली असून, माळेगाव येथील जेसीबी चालकास बिबट्या दिसल्याची माहिती माळेगावचे उपसरपंच राहुल जाधव यांनी माध्यमांना दिली. त्यांनी सांगितले की, “आमच्या भागात बिबट्याचा वावर सतत वाढतो आहे. वनविभागाने यावर ठोस पावले उचलून गावांमध्ये जनजागृती कार्यशाळा घ्याव्यात, जेणेकरून नागरिक भयमुक्त राहतील,” अशी मागणी त्यांनी केली.
