Bhor News : भोर : भोर मार्गे महाडला जाणाऱ्या मार्गावर असलेल्या वरंध घाटात उंबर्डे गावाच्या हद्दीत ९० फूट खोल दरीत कार कोसळल्याची घटना बुधवारी (ता. १८) दुपारी घडली. सुदैवाने गाडीत कोणीही नसल्याने मोठा अनर्थ टळला आहे.

सुदैवाने जीवितहानी टळली

मिळालेल्या माहितीनुसार, भोर मार्गे महाडच्या दिशेने जात असताना वरंधा घाटातील उंबर्डे (ता. भोर) गावच्या हद्दीत गाडीतून धूर निघत असल्याचे चालकाच्या लक्षात आले. (Bhor News) चालकाने गाडी रस्त्याच्या बाजूला उभी करून गाडीतील चालकासह तिघे प्रवासी गाडीतून खाली उतरले. परंतु अचानक गाडी उताराने पुढे जाऊन दरीत कोसळली. सुदैवाने गाडीत कुणी नसल्याने अनर्थ टळला.

मात्र, यात गाडीचे मोठ्या प्रमाणात नुकसान झाल्याचे प्रथमदर्शी अक्षय धुमाळ यांनी सांगितले. याबाबत भोर पोलीस ठाण्यात अद्यापपर्यंत अपघाताबाबत कोणतीही नोंद करण्यात आली नसल्याचे भोर पोलीस स्टेशनकडून सांगण्यात आले.