जुन्नर : शिवनेरीजवळ असलेल्या तुळजा लेणी येथे जवळपास 70 पर्यटकांवर मधमाशांनी हल्ला केल्याची घटना घडली आहे. शिवजयंतीच्या पूर्वसंध्येला हा हल्ला झाल्याने एकच खळबळ उडाली आहे. जखमींना जुन्नर येथील ग्रामीण रुग्णालयात दाखल करण्यात आले आहे.
मिळालेल्या माहितीनुसार, आलेले पर्यटक हे मुंबई आणि पुण्यासह अन्य ठिकाणांहून पर्यटनासाठी आले होते. दुपारच्या वेळी काही हुल्लडबाज तरुण पर्यटकांनी मधमाशांच्या मोहोळावर दगड मारले. त्यामुळे मधमाशांनी दिसेल त्या पर्यटकांवर हल्ला चढवला असल्याची प्राथमिक माहिती आहे. यात हल्ल्यात जवळपास 70 पर्यटकांचा मधमाशांनी चावा घेतला. या हल्ल्यात लहान मुलांचा देखील मधमाशांनी चावा घेतला आहे. चार जण यात गंभीर जखमी झाले आहेत.
उद्या (19 फेब्रुवारी)रोजी शिवनेरी येथे छत्रपती शिवाजी महाराजांची जयंती मोठ्या उत्साहात साजरी केली जाणार आहे. मुख्यमंत्री, उपमुख्यमंत्री या कार्यक्रमासाठी हजेरी लावणार आहेत. अगदी सकाळीच ते तेथे उपस्थित राहतील. मात्र अचानक झालेल्या हल्ल्याने आलेले पर्यटक भांबाऊन गेले,मिळेल त्या वाटेने सैरभैर पळू लागले.
दरम्यान, किल्ले शिवनेरीवर शिवजयंतीच्या उत्सवाची जोरदार तयारी सुरू आहे. शिव जनमोत्सव उत्साहात साजरा केला जाणार आहे. पोलिसांकडून योग्य ती काळजी घेण्यात आली आहे. नागरिकांना पास देऊनच किल्ल्यावर प्रवेश दिला जात आहे. मात्र ही घटना घडल्याने एकच खळबळ उडाली आहे.
