हडपसर : फटाके बाजूला जाऊन उडवा, असे सांगितले म्हणून एकाला मारहाण करण्यात आल्याची घटना वैदुवाडी येथे घडली. याप्रकरणी हडपसर पोलीस स्टेशनमध्ये नऊ जणांवर गुन्हा दाखल करत मारहाण करणार्या पाच आरोपींना बेड्या ठोकण्यात आल्या आहेत. यामधील एक आरोपी हा अल्पवयीन आहे.
आवेश फिरोज शेख (वय 23, मार्कंडेय नगर, वैदुवाडी), शाहरुख इसाक शेख (वय 27,मार्कंडेय नगर, वैदुवाडी ), गणेश किसन कोंडीलू (वय 36 वर्ष,मार्कंडेय नगर, वैदुवाडी), शबाना नबीलाल शेख (वय 45 वर्ष, भीम नगर झोपडपट्टी संघ, वैदुवाडी), सीमा गणेश कोंडीलू (वय 32 वर्ष, भीम नगर झोपडपट्टी संघ, वैदुवाडी), साहिल शेख (भीम नगर झोपडपट्टी संघ, वैदुवाडी), उमर शेख (भीम नगर झोपडपट्टी संघ, वैदुवाडी), आसमा इसाक शेख (भीम नगर झोपडपट्टी संघ, वैदुवाडी) आयान (भीम नगर झोपडपट्टी संघ, वैदुवाडी) अशी गुन्हा दाखल झालेल्या आरोपींची नावे आहेत. तसेच सुभान रमजान शेख (वय 16 वर्ष, खजुरे वस्ती, वैदुवाडी) हा अल्पवयीन असल्यामुळे त्याला ताब्यात घेऊन बाल न्यायालयात पाठविण्यात आले आहे. याबाबत बाळासाहेब सिताराम आवटे (वय 52 वर्ष, रा- वैदुवाडी ) यांनी फिर्याद दिली आहे.
पोलिसांनी दिलेल्या माहितीनुसार, नऊ नोव्हेंबर रोजी रात्री 21.30 वाजताच्या सुमारास बबन टपरी समोर, वैदुवाडी हडपसर पुणे येथे फिर्यादी यांनी घराच्या बाहेर वाढदिवस साजरा करून फटाके वाजवीत असल्याने शाहरुख शेख,आवेश फिरोज शेख, गणेश कोंडेलू व इतर यांना फटाके बाजूला उडवा, असे सांगितले. या किरकोळ कारणावरून त्यांच्यात वाद विवाद झाले. त्यानंतर आरोपींनी फिर्यादी, फिर्यादीची पत्नी,अभिषेक सोनवणे, सनी आवटे यांना शिवीगाळ केली. तसेच हाताने, बेल्टने व दगडाने मारहाण करून दुखापत केली. या प्रकरणी पाच आरोपींना अटक करण्यात आली आहे. पुढील तपास पोलीस उपनिरीक्षक महेश कवळे करत आहेत.
