पंढरपूर : आषाढी वारीच्या पार्श्वभूमीवर पालकमंत्री जयकुमार गोरे यांनी मोठा निर्णय घेतला आहे. पंढरपूर शहर परिसरात तब्बल दहा दिवस मांसविक्रीला बंदी असणार आहे. मुख्यमंत्री दवेंद्र फंडवीस यांच्या आदेशानंतर आजपासून वारी मार्गावरील मद्य आणि मांसाची दुकाने पुढील दहा दिवस बंद राहणार असल्याचे त्यांनी सांगितले आहे.

गेल्या अनेक वर्षापासून वारकरी संप्रदायाकडून पंढरपूरच्या वारीत मांस विक्री बंद ठेवण्याची मागणी होत होती. आता या निर्णयामुळे वारीचे पावित्र्य, सात्विकता आणि आध्यात्मिक जपता येणार असून, वारकरी संप्रदायासह समाजातील विविध स्तरातून या निर्णयाचे स्वागत केले जात आहे.
आषाढी वारीसाठी पंढरपूर शहर आणि परिसरात तब्बल दहा दिवस मांस विक्रीला बंदी घालण्यात आली आहे. आषाढी एकादशीच्या अगोदर सात दिवस आणि नंतर तीन दिवस असे दहा दिवस मांस विक्री बंद असणार आहे.

दरम्यान, भाजपा आध्यात्मिक आघाडीचे प्रमुख आचार्य तुषार भोसले यांनी, पालखी ज्या-ज्या मार्गाने जाईल त्या गावांमध्ये संपूर्ण दिवस मद्य आणि मांस विक्री बंद ठेवण्यात यावी. यात्रा कालावधीत पंढरपूर परिक्षेत्रात मद्य-मांस विक्री बंद ठेवण्यात यावी व व्हीआयपी वाहनांना बंदी घालण्यात यावी अशा तीन मागण्या मुख्यमंत्री देवेंद्र फडणवीस यांच्याकडे केल्या होत्या. मुख्यमंत्र्यांनी या मागण्यांना मान्यता दिली असून, आचार्य तुषार भोसले यांनी मुख्यमंत्री देवेंद्र फडणवीस यांचे आभार मानले आहेत.







