लोणी काळभोर : कोलवडी (ता. हवेली) येथील विविध कार्यकारी सेवा सहकारी संस्थेच्या अध्यक्षपदी माजी सरपंच बबन भानुदास गायकवाड यांची, तर उपाध्यक्षपदी मनिषा सयाजी घूमे यांची बिनविरोध निवड करण्यात आली.
मावळते अध्यक्ष गिरीष पवार व उपाध्यक्ष संतोष मुरकुटे यांनी आपल्या पदाचा राजीनामा दिल्यानंतर हे पद रिक्त झाले होते. या पदासाठी संस्थेच्या कार्यालयात शनिवारी (ता. ६) निवडणूक प्रक्रिया पार पडली. ही निवडणूक प्रक्रिया निवडणूक निर्णय अधिकारी एस. एन. देसाई यांच्या अध्यक्षतेखाली पार पडली. निवडणूक प्रक्रियेत अध्यक्षपदी बबन गायकवाड यांची तर उपाध्यक्षपदी मनिषा घूमे यांची सर्वानुमते बिनविरोध निवड करण्यात आली.
दरम्यान, नवनिर्वाचीत अध्यक्ष बबन गायकवाड व उपाध्यक्ष निषा घूमे यांचा संस्थेच्या वतीने सत्कार करण्यात आला. या वेळी यशवंत सहकारी साखर कारखान्याचे माजी संचालक तुकाराम पवार, संस्थेचे माजी अध्यक्ष सुभाष उंद्रे, बाळासाहेब गायकवाड, शामराव शितोळे, आनंदा भालसिंग, अर्जुन मदने, बाजीराव भालसिंग, संस्थेचे संचालक व ग्रामस्थ मोठ्या संख्येने उपस्थित होते.
“आगामी काळात संस्थेचा कारभार पारदर्शकपणे करणार आहे. शेतकऱ्यांना त्वरित पिक कर्जपुरवठा देणे, मध्यम मुदत कर्ज वाटप सुरु करणे व कर्ज पूर्ण भरलेल्या सभासदांना पुन्हा कर्ज उपलब्ध करून देणार आहे. तसेच संचालक मंडळ आणि सर्व सदस्यांना विश्वासात घेऊन संस्थेचा विकास करण्यासाठी प्रयत्न करणार आहे,” असे नवनिर्वाचित अध्यक्ष बबन गायकवाड व उपाध्यक्ष मनिषा घूमे यांनी सांगितले.
