Pune Crime: चाकण (पुणे): पत्नीशी प्रेमसंबंध असल्याच्या संशयावरून पतीने संशयित व्यक्तीच्या अंगावर गाडी घालून त्यास गंभीर जखमी केल्याचा धक्कादायक प्रकार समोर आला आहे. ही घटना गुरुवारी (२३ नोव्हेंबर) मध्यरात्री पावणे दोन वाजताच्या सुमारास नाणेकरवाडी चाकण येथील विठ्ठल मंदिरासमोर घडली.
याप्रकरणी चाकण पोलीस ठाण्यात महेश जोपा नाणेकर (वय ३४, रा. नाणेकरवाडी, ता. खेड) यांनी फिर्याद दिली आहे. त्यानुसार पोलिसांकडून ३५ वर्षीय व्यक्तीला अटक करण्यात आली आहे.
पोलिसांनी दिलेल्या माहितीनुसार, आरोपी व्यक्तीला त्याच्या पत्नीसोबत फिर्यादी यांचे प्रेमसंबंध असल्याचा संशय होता. त्याच कारणावरून त्याने त्याची फोर व्हीलर गाडी फिर्यादी यांच्या अंगावर घातली. यामध्ये फिर्यादी हे गंभीर जखमी झाले आहेत. तसेच त्यांच्या दुचाकीचे देखील मोठे नुकसान झाले आहे. पोलिसांनी आरोपीला अटक केली असून चाकण पोलीस आधिक तपास करीत आहेत.
