पुणे : पुण्यात वाहातून नियम मोडणाऱ्यांवर गेल्या काही दिवसांपासून कारवाई सुरु असून, यासाठी पुणे वाहतूक पोलीस AI टेक्नॉलॉजीचा वापर करत आहेत. AI टेक्नॉलॉजीचा वापर करून पुणे पोलिसांनी फर्ग्युसन रोडवर वाहतूक नियमांचे उल्लंघन करणाऱ्यांवर कठोर कारवाई करत बेशिस्त पुणेकरांना मोठा धडा शिकवला आहे.
या टेक्नॉलॉजीचा वापर करत पुणे वाहतूक पोलिसांनी मागील काही महिन्यांत तब्बल ३२२० जणांवर दंडात्मक कारवाई केली आहे. यामुळे अनेकांच्या खिशाला कात्री लागली आहे. यामध्ये प्रामुख्याने चुकीच्या पद्धतीने वाहन पार्किंग, सिग्नल तोडणे आणि हेल्मेट न घालणे यासारख्या नियमभंगांचा समावेश आहे.
पुणे पोलिसांनी वाहतूक व्यवस्थापनात सुधारणा करण्यासाठी कृत्रिम बुद्धिमत्ता (AI) आधारित कॅमेरे आणि तंत्रज्ञानाचा वापर सुरू केला आहे. फर्ग्युसन रोडसारख्या गर्दीच्या ठिकाणी AI-आधारित कॅमेरे वाहतूक नियमांचे उल्लंघन टिपतात आणि थेट संबंधित वाहनचालकांना दंडाची पावती पाठवली जाते. या तंत्रज्ञानामुळे नियमांचे उल्लंघन करणाऱ्यांना त्वरित लक्ष्य करता येते आणि “चुकीला माफी नाही” हा संदेश स्पष्टपणे दिला जात आहे.
पोलिसांच्या मते, AI चा वापर केवळ दंड वसूल करण्यासाठीच नाही, तर पुणेकरांमध्ये वाहतूक नियमांबाबत शिस्त आणि जागरूकता निर्माण करण्यासाठीही केला जात आहे. मात्र, काही नागरिकांनी या कारवाईवर नाराजी व्यक्त केली असून, दंडाच्या रकमेच्या पारदर्शकतेबाबत आणि AI च्या अचूकतेबाबत प्रश्न उपस्थित केले आहेत.
पुणे पोलिसांनी यापुढेही अशा कारवाया तीव्र करण्याचा इरादा व्यक्त केला आहे, जेणेकरून शहरातील वाहतूक व्यवस्था अधिक सुरळीत आणि शिस्तबद्ध होईल.
