पुणे : महायुती सरकारमधील मंत्री आणि शिवसेनेचे नेते भरत गोगावले यांचे नाव गेल्या काही दिवसांपासून चर्चेत आहे. गोगावले यांनी रश्मी ठाकरे यांच्या हस्तक्षेपामुळेच शिवसेनेत फूट पडल्याचा गंभीर आरोप केल्यानंतर राजकीय वर्तुळात चर्चांना उधाण आले होते. गोगावले यांच्या या आरोपानंतर ठाकरे गटातील नेते चांगलेच आक्रमक झाल्याचे पाहायला मिळत आहे.
याचदरम्यान, ठाकरे गटातील नेते वसंत मोरे यांनी गोगावले यांच्याबाबत एक मोठा गौप्यस्फोट केला आहे. वसंत मोरे यांनी दावा केला आहे की, भरत गोगावले यांनी विधानसभा निवडणुकीच्या आधी आपल्या घरात अघोरी पूजा केली होती. त्यांनी उज्जैन येथून बागलामुखी देवीच्या मंदिरातील 11 महाराजांकडून ही पूजा घातली होती. यासंबंधित व्हिडिओ देखील मोरे यांनी समोर आणले आहेत. आता वसंत मोरे यांच्या या दाव्यांनंतर राज्याच्या राजकरणात एकच खळबळ उडाली आहे.
विधानसभा निवडणूक 20 नोव्हेंबर रोजी होती, त्यापूर्वी 1 महिना भरत गोगावले यांनी त्यांच्या घरात ही पूजा घातली होती. असं मोरे यांनी म्हंटल आहे. अशा पूजा होणार असतील तर आम्ही भरत गोगावले यांच्याविरुद्ध अंधश्रद्धा निर्मूलन समितीमध्ये तक्रार करणार आहोत. असंही मोरे म्हणाले आहेत. सोबतच या पूजेसाठी १५ लाख रुपये मांत्रिक घेतात. असेही त्यांनी यावेळी सांगितलं.
पुढे रश्मी ठाकरे यांच्याबाबत केलेल्या वक्तव्यावर वसंत मोरे म्हणाले, ‘रश्मी वाहिनी यांच्यावर केलेले आरोप चुकीचे आहेत. महिलांनी राजकारणात सहभाग घेतला पाहिजे असे सगळे म्हणतात. एखादी महिला नवऱ्याच्या पाठीमागे खंभीरपणे उभी राहत असेल तर त्यात गैर काय आहे? असा सवालही त्यांनी यावेळी विचारला आहे.
