Accident : पुण्यातील संगमवाडी रस्त्यावर शनिवारी दुपारी साडेबाराच्या सुमारास घडलेल्या एका धक्कादायक घटनेने संपूर्ण शहर हादरले. भरवर्दळीच्या रस्त्यावर, अनेक नागरिकांच्या डोळ्यांसमोर एका युवकाला कारच्या बोनेटवर अडकलेल्या अवस्थेत तब्बल दोन किलोमीटरपर्यंत फरफटत्या नेण्यात आल्याचा प्रकार समोर आला आहे. या घटनेचा व्हिडीओ सोशल मीडियावर मोठ्या प्रमाणात व्हायरल झाला असून, नागरिकांमध्ये तीव्र संताप व्यक्त केला जात आहे. (Accident)
प्रत्यक्षदर्शींनी दिलेल्या माहितीनुसार, ही घटना एका किरकोळ वादातून सुरू झाली. कल्याणी नगरकडून संगमवाडी चौकाच्या दिशेने येताना एका महिला चालकाची आणि इनोव्हा कार चालवणाऱ्या युवकाची बाचाबाची झाली. नेमके वादाचे कारण स्पष्ट झाले नसले, तरी काही क्षणांतच हा वाद आक्रमक झाला. इनोव्हा चालकाने रस्त्यात कार आडवी लावून महिलेची कार अडवण्याचा प्रयत्न केला. याच वेळी तो युवक महिलेच्या कारसमोर उभा राहिला.
मात्र, परिस्थिती हाताबाहेर जात असतानाही महिलेने कार थांबवण्याऐवजी ती वेगात पुढे नेली. युवक बोनेटवर अडकलेला असतानाच कार पुढे धावत राहिली. सुमारे दोन किलोमीटर अंतरापर्यंत हा थरार सुरू होता. रस्त्याच्या कडेला उभे असलेले नागरिक, वाहनचालक आणि पादचारी हे दृश्य पाहून हादरून गेले. अनेकांनी आरडाओरडा करत कार थांबवण्याचा प्रयत्न केला, पण तो निष्फळ ठरला. (Accident)
अखेर महिलेने ब्रेक दाबल्यानंतर युवक रस्त्यावर फेकला गेला आणि तो गंभीर जखमी झाला. VIP बंदोबस्तासाठी परिसरात असलेल्या पोलिसांनी तातडीने त्याला रुग्णालयात दाखल केले.
ही घटना केवळ एका वादाची नसून, वाढत्या रस्ते असहिष्णुतेचे आणि ‘रोड रेज’चे भयावह चित्र दाखवते. शहरातील वाढती वाहतूक, ताणतणाव आणि संयमाचा अभाव यामुळे सामान्य वादही जीवघेणे ठरत असल्याचे या घटनेतून स्पष्ट होते. अशा प्रकारांवर कठोर कारवाई होणे आणि नागरिकांनीही संयम राखणे आज अत्यंत गरजेचे बनले आहे.
