पुणे: पुणे जिल्ह्यातील जुन्नर तालुक्यात बिबट्याच्या हल्ल्याची धक्कादायक घटना समोर आली आहे. ओतूर परिसरातील वाकचौरे मळा येथे सकाळी मॉर्निंग वॉकला गेलेल्या 10 वर्षीय मुलीवर बिबट्याने अचानक हल्ला केला. या हल्ल्यात मुलगी गंभीर जखमी झाली असून तिच्यावर उपचार सुरू आहेत. या घटनेमुळे परिसरात भीतीचे वातावरण निर्माण झाले आहे.
मिळालेल्या माहितीनुसार, काव्या वाकचौरे (वय 10) ही आपल्या बहिणीसोबत घराजवळ सकाळी फिरायला गेली होती. त्यावेळी झुडपातून अचानक बिबट्या बाहेर आला आणि काव्यावर झडप घातली. या अचानक झालेल्या हल्ल्याने दोन्ही मुली घाबरल्या आणि आरडाओरडा सुरू केला.
मुलींचा आवाज ऐकून ग्रामस्थ तातडीने घटनास्थळी धावले. नागरिकांची गर्दी आणि गोंधळ वाढताच बिबट्याने जखमी अवस्थेत मुलीला सोडून जंगलाच्या दिशेने पळ काढला. या हल्ल्यात काव्याच्या मानेवर आणि शरीरावर गंभीर जखमा झाल्या आहेत.
जखमी मुलीला कुटुंबीयांनी तातडीने उपचारासाठी रुग्णालयात नेले. मात्र स्थानिक आरोग्य व्यवस्थेबाबत प्रश्न उपस्थित झाले आहेत. त्यानंतर तिला अन्य ठिकाणी वैद्यकीय उपचारासाठी हलवण्यात आले.
घटनेची माहिती मिळताच वनविभागाचे अधिकारी घटनास्थळी पोहोचले. वाकचौरे मळा परिसरात बिबट्यांचा वावर वाढत असल्याचा आरोप ग्रामस्थांनी केला आहे. या पार्श्वभूमीवर वनविभागाने तातडीने उपाययोजना करून नागरिकांच्या सुरक्षेसाठी पावले उचलावीत, अशी मागणी स्थानिकांकडून करण्यात येत आहे.
या घटनेमुळे ओतूर आणि परिसरातील नागरिकांमध्ये भीती आणि संतापाचे वातावरण निर्माण झाले असून वनविभाग आणि प्रशासनाकडून पुढील हालचालींकडे सर्वांचे लक्ष लागले आहे.
