पुणे: पुण्यातील कात्रज परिसरातून प्रवास करणाऱ्या प्रवाशांसाठी महत्त्वाची वाहतूक अपडेट समोर आली आहे. कात्रज पोलीस चौकीसमोरील पीएमपी बसस्थानकावर महामेट्रोकडून नवीन मेट्रो स्टेशनच्या कामाला सुरुवात झाली आहे. या कामामुळे वाहतुकीवर परिणाम होऊ नये आणि प्रवाशांची गैरसोय टाळण्यासाठी काही प्रमुख बसमार्गांचे थांबे तात्पुरते बदलण्यात आले आहेत.
मिळालेल्या माहितीनुसार, कात्रज बायपास रोडवरील पुलाखालील मोकळ्या जागेतून काही बससेवा आता सुरू होणार आहेत. यामध्ये 2, 23A, 91K, 24, 24A, 90, 103, 235, 236, 301 आणि 301A या मार्गांचा समावेश आहे. तसेच K-11 ते K-14 आणि K-18 या विशेष बससेवाही याच ठिकाणाहून धावतील. रातराणी 1 आणि 2 या बसेसचे थांबेही याच भागात हलवण्यात आले आहेत.
गुजरवाडी बसस्थानकावरून सुटणाऱ्या 42, 218, 291 आणि 339 या बसमार्गांमध्येही बदल करण्यात आला आहे. या बसेस कात्रज चौकातून डावीकडे वळून पुलाखालील तात्पुरत्या थांब्यावरून प्रवासी घेऊन पुढे नियमित मार्गाने प्रवास करतील.
याशिवाय 43, 43A, 44, 45, 214 आणि 228 या बसमार्गांवरील वाहतूक आता थेट कात्रज बायपास सर्व्हिस रोडवरून चालवली जाणार आहे.
हा बदल 20 मेपासून लागू करण्यात आला असून मेट्रोच्या कामाला गती देण्यासाठी आणि वाहतूक कोंडी टाळण्यासाठी प्रशासनाने ही व्यवस्था केली आहे. प्रवाशांनी नव्या थांब्यांची आणि मार्गबदलांची माहिती घेऊन प्रवास करावा, असे आवाहन पीएमपी प्रशासनाने केले आहे.
मेट्रो प्रकल्पाच्या कामामुळे काही काळ वाहतुकीत बदल राहणार असल्याने कात्रज परिसरातील रोजचे प्रवासी आणि नोकरदारांनी विशेष काळजी घेण्याची गरज आहे.
