पुणे : पालखी महामार्गावरील हडपसर ते दिवेघाट या अंतराचे चौपदरीकरण आणि दुरुस्तीसाठी केंद्रीय रस्ते वाहतूक व महामार्ग मंत्रालयाने 792.39 कोटी रुपयांचा निधी मंजूर केल्याची माहिती खासदार सुप्रिया सुळे यांनी दिली. तसेच ठपुराव्याला प्रतिसाद देत निधी मंजूर केल्याबद्दल केंद्रीय रस्ते व महामार्ग मंत्री नितीन गडकरी यांचे आभारही त्यांनी मानले आहेत.
हडपसर ते दिवेघाट या पालखी महामार्गावर वाहतूक कोंडी आणि रस्त्यावरील खड्ड्यांमुळे वाहनचालकांना मोठी कसरत करावी लागते. याशिवाय घाट भाग हा वन विभागाच्या हद्दीत असल्याने रस्त्याच्या रुंदीकरणास अडथळे येत होते. यामधून मार्ग काढण्यासाठी खासदार सुप्रिया सुळे सातत्याने या रस्त्याच्या कामासाठी केंद्रीय महामार्ग मंत्रालयाकडे पाठपुरावा करत होत्या.
राष्ट्रवादीचे अध्यक्ष शरद पवार यांनीही याबाबत केंद्राकडे शब्द टाकला होता. आता त्याला यश आले असून काही दिवसांपूर्वी निविदा काढण्याचे आदेश देण्यात आले. त्यावेळी 399.02 कोटी रुपये मंजूर करण्यात आले होते. त्यात आता वाढ करण्यात आली असून 792.39 कोटींचा निधी मंजूर करण्यात आला आहे.
आपणास कळविण्यात आनंद होत आहे की, केंद्रीय रस्ते व महामार्ग मंत्रालयाने राष्ट्रीय महामार्ग क्रमांक ९६५ च्या हडपसर ते दिवे घाट या १३.२५ किमी लांबीच्या अंतराचे चौपदरीकरण करण्यासाठी ७९२.३९ कोटी रुपयांचा निधी मंजूर केला आहे. हे काम पुर्ण झाल्यावर हडपसर – दिवे घाट या मार्गावरील वाहतूक…
— Supriya Sule (@supriya_sule) December 14, 2023
खासदार सुप्रिया सुळे यांनी या निधीसाठी केंद्रीय रस्ते वाहतूक आणि महामार्ग नितीन गडकरी यांचे आभार मानले आहेत. हे काम पूर्ण झाल्यावर हडपसर ते दिवेघाट या मार्गावरील वाहतूक कोंडीची समस्या काही प्रमाणात दूर होणार आहे, असे त्यांनी म्हटले आहे. याच मार्गावरून ज्ञानेश्वर माऊलींची पालखी जाते. हा पालखी सोहळा देखील अतिशय उत्तम पद्धतीने पार पडू शकेल, असेही सुप्रिया सुळे यांनी नमूद केले आहे.
