पिंपरी-चिंचवड : पिंपरी-चिंचवड महापालिकेकडून प्रसिद्ध करण्यात आलेल्या प्रारूप प्रभागरचनेवर बुधवारी (दि. 3) सायंकाळपर्यंत एकूण 42 हरकती दाखल झाल्या आहेत. सुरुवातीला हरकतींचा वेग कमी होता, मात्र मुदतीच्या शेवटी त्यात वाढ झाली आहे. गुरुवारी दुपारी 3 वाजेपर्यंत नागरिकांना हरकत नोंदविण्याची अखेरची संधी आहे.
महापालिका प्रशासनाने आपल्या संकेतस्थळावर संपूर्ण शहराचा नकाशा उपलब्ध करून दिला आहे. तसेच, महापालिका भवन, तसेच सर्व आठ क्षेत्रीय कार्यालयांच्या आवारात हे नकाशे व संबंधित माहिती लावण्यात आली आहे. नागरिकांनी या नकाशांचा अभ्यास सुरू केला आहे. विशेष म्हणजे, फेब्रुवारी 2017 प्रमाणेच प्रभागरचना असल्याने यावर्षी हरकतींची संख्या तुलनेने कमी आहे.
मंगळवारपर्यंत प्रभागरचनेवर केवळ 10 हरकती दाखल झाल्या होत्या. मात्र बुधवारीच 32 हरकती दाखल झाल्याने एकूण संख्या 42 वर पोहोचली. इच्छुकांना हरकत नोंदविण्यासाठी आज दुपारी 3 वाजेपर्यंतच मुदत आहे. त्यामुळे अंतिम टप्प्यात अजून काही हरकती वाढण्याची शक्यता आहे.
महापालिका भवनातील तळमजल्यावरील निवडणूक कार्यालयात नागरिकांकडून हरकती दाखल केल्या जात आहेत. यामध्ये काही नागरिकांकडून तीनशेहून अधिक लोकांच्या नावांचा एकत्रित गठ्ठा करून हरकती सादर करण्याचा प्रयत्न करण्यात आला. मात्र, निवडणूक विभागाने या हरकती स्वीकारण्यास नकार दिला.
एकाच व्यक्तीमार्फत शेकडो इतरांच्या नावाने एकसारख्या हरकती दाखल करता येणार नाहीत. प्रत्यक्ष व्यक्तीने स्वतः हजर राहून हरकत नोंदवावी लागेल, असे स्पष्ट निर्देश निवडणूक विभागाचे सहायक आयुक्त अविनाश शिंदे यांनी दिले आहेत.
