केडगाव: मावळ तालुक्यातील लोणावळ्याजवळ मुंबई-पुणे हायवेच्या शेजारी टाकलेले अन्न मेंढ्यांनी खाल्ल्याने विषबाधा होऊन मेंढपाळ काळूराम शिवाजी बरकडे (रा. वानकुटा, ता. पारनेर, जि. नगर) यांच्या सुमारे २०० मेंढ्यांचा मृत्यू दोनच दिवसांत झाल्याने मेंढपाळ कुटुंबावर दु:खाचा डोंगर कोसळला आहे. यामुळे मेंढपाळाचे जवळपास 25 लाखांपेक्षा जास्त नुकसान झाल्याचे सांगितले जात आहे.
मेंढपाळ काळूराम शिवाजी बरकडे आपल्या जवळपास २०० पेक्षा जास्त मेंढ्यांचा कळप रविवारी (दि.28) दुपारी चारनंतर मावळ तालुक्यातील लोणावळाजवळ जेवरेवाडी शिवारात आपल्या मेंढ्या चारत असताना मेंढ्या रस्त्याच्या कडेला पडलेल्या अन्नाच्या ढिगार्याकडे गेल्या आणि पटपट चारा समजून ते सडलेले अन्न खाऊ लागल्या. परिणामी, ३ ते ४ तासानंतर करंडोली येथे रात्रीच्यावेळीच वाड्यावर टप्प्याटप्प्याने जवळपास ११७ मेंढ्यांचा मृत्यू झाल्याने मेंढपाळांच्या वाड्यावर रात्रभर आक्रोश पाहावयास मिळाला. तर सोमवारी (दि.२९) दुपारनंतर जवळपास ८० मेंढ्या मृत्यू पावल्या आहेत.
अचानक एकाएकी मेंढ्यांचा मृत्यू होऊ लागल्याने मेंढपाळालाही काही समजेनासे झाले. सकाळी मेंढपाळाच्या वाढ्यावरील आक्रोश पाहून संपूर्ण गाव धावून आले होते. याठिकाणी आलेला प्रत्येकजण समोरील दृश्य पाहून हळहळ व्यक्त करत होता.
या घटनेचा शासनाच्या वतीने पंचनामा केला. यावेळी नायब तहसिलदार केदारी, तलाठी जाधव, मंडळ अधिकारी उज्वला पवार, पशुसंवर्धन वैद्यकीय अधिकाऱ्यासह गावचे सरपंच, पदाधिकारी यांनी येऊन भेट दिली. मेंढपाळ कुटुंबाचे सांत्वन केले व मदत मिळवून देण्याचे आश्वासन दिले आहे. त्यानंतर जेसीबीच्या सहाय्याने सर्वच्या सर्व मेंढ्या पुरण्यात आल्या.
