Pune Drought News : राज्यातील दुष्काळसदृष परिस्थितीच्या पार्श्वभूमीवर अनेक जिल्ह्यात दुष्काळ घोषित करण्यात आला आहे. यामध्ये पुणे जिल्ह्यातील ११ तालुक्यांचा समावेश करण्यात आला आहे. पुणे जिल्ह्यात यापूर्वी केंद्राच्या निकषानुसार बारामती, पुरंदर हे दोन तालुके पूर्णतः तर इंदापूर, शिरूर आणि दौंड तालुक्यात अंशतः दुष्काळी जाहीर करण्यात आले होते.
दरम्यान राज्य सरकारने जिल्ह्यातील ३१ महसूल मंडळांचा दुष्काळाच्या यादीत मुळशी, वेल्हे हे दोन तालुके वगळता अन्य सर्व तालुक्यांमधील महसूल मंडळांचा समावेश केला आहे. त्यामुळे जिल्ह्यातील ११ तालुके दुष्काळी म्हणून घोषित करण्यात आले आहेत. दुष्काळ जाहीर करण्यात आलेल्या ठिकाणी ७५ टक्क्यांपेक्षा कमी पाऊस झालेल्या गावांचा समावेश करण्यात आला आहे. जून ते सप्टेंबर या कालावधीत सरासरीच्या तुलनेत ७५ टक्के कमी पाऊस झाल्याने या गावांना टंचाईसदृश म्हणून जाहीर करण्यात आले आहे.(Pune Drought News)
राज्यातील अनेक भागात दुष्काळाची स्थिती
राज्यातील अनेक भागात दुष्काळाची स्थिती दिवसेंदिवस वाढतच चालली आहे. नोव्हेंबर महिन्यातच अनेक भागात पाणीटंचाईची स्थिती निर्माण झाली असून जनावरांच्या चाऱ्यांचा प्रश्नही निर्माण झाला आहे. पुणे जिल्ह्यातील स्थितीदेखील कठीण बनत आहे. यामुळेच जिल्ह्यातील ११ तालुक्यांचा समावेश केला आहे.
