पुणे : उपमुख्यमंत्री तथा पुण्याचे पालकमंत्री अजित पवार यांनी १७ फेब्रुवारीला झालेल्या जिल्हास्तरीय बैठकीत श्रीक्षेत्र जेजुरी गड तीर्थक्षेत्र विकास आराखड्यांतर्गत जेजुरी येथील बाह्यवळण रस्त्याचा समावेश करण्याच्या सूचना दिल्या होत्या. याला मुख्यमंत्री एकनाथ शिंदे यांच्या अध्यक्षतेखालील समितीची मंजूरी मिळाली असून, त्यासाठी १० कोटी ६८ लाख ७५ हजार रुपयांचा निधी मंजूर करण्यात आला.
अजित पवार यांनी जेजुरी येथील बाह्यवळण रस्त्याचा समावेश करण्याच्या सूचना दिल्या होत्या. तसेच त्यासंदर्भातील कार्यवाही तातडीने पूर्ण करण्याचे निर्देश अधिकाऱ्यांना दिले होते. त्यानुसार प्रस्ताव तयार करुन त्यास मुख्य सचिवांच्या अध्यक्षतेखालील उच्चस्तरीय समितीची आणि मुख्यमंत्र्यांच्या शिखर समितीची मान्यता घेण्यात आली. बुधवारी नवीन कामांचा व निधी मंजुरीचा शासन निर्णय जारी करण्यात आला. त्यात श्री क्षेत्र जेजुरी गड तीर्थक्षेत्र विकास आराखड्याअंतर्गत जेजुरी येथील बाह्यवळण रस्त्याचा समावेश आहे.
राज्य शासनाच्या वतीने श्री खंडोबा देवाच्या व जेजुरी शहर विकासासाठी सुमारे ३४९.४५ कोटी रकमेचा श्रीक्षेत्र जेजुरीगड तीर्थक्षेत्र विकास आराखडा एकूण तीन टप्प्यांत राबविण्यात येत आहे. पहिल्या टप्प्यासाठी मंजूर करण्यात आलेल्या १०९ कोटी ५७ लाख रुपयांच्या कामांमध्ये अधिकचे १० कोटी ६८ लाख रुपये मंजूर करुन हा नवीन बाह्यवळण रस्ता समाविष्ट करण्यात आला.
खर्च आणि त्यासाठी करण्यात आलेली तरतूद
या निधीतून, मंदिर व संपूर्ण तटबंदीचे जतन व दुरुस्तीसाठी ११ कोटी २३ लाख रुपये, दीपमाळांचे जतन व दुरुस्तीसाठी ११ कोटी २५ लाख रुपये, उत्तर-पूर्व व पश्चिम पायर्या, १३ कमानी, सहायक संरचना जतन आणि दुरुस्तीसाठी १२ कोटी २२ लाख रुपये, ऐतिहासिक होळकर व पेशवे तलाव आणि इतर जलकुंडांचे जतन व दुरुस्तीसाठी १२ कोटी ५६ लाख रुपये.
तसेच मल्हार गौतमेश्वर मंदिर, लवथळेश्वर व बल्लाळेश्वर मंदिरांचे जतन व दुरुस्तीसाठी २ कोटी २ लाख रुपये, कडेपठार मंदिर दोन पायरी मार्गांचे जतन व दुरुस्तीसाठी १० कोटी ७३ लाख रुपये खर्चाची तरतूद करण्यात आली. तसेच मूलभूत पायाभूत सुविधेअंतर्गत १२ कोटी रुपये, भूदृशे विकसित करण्यासाठी १८ लाख रुपये आदी कामांचा समावेश आहे.
