पुणे : एकवीरा देवी गडावर जाण्यासाठी रोप-वे प्रस्तावित करण्यात येणार असल्याची माहिती रस्ते विकास महामंडळाचे अधीक्षक अभियंता राहुल वसईकर यांनी दिली आहे. हा प्रकल्प आगोदर भारतीय पुरातत्त्व विभाग, वनविभाग यांच्या सहकार्याने पर्यटन विभागाकडून करण्यात येणार होता. आता महाराष्ट्र राज्य रस्ते विकास महामंडळाकडून हा प्रकल्प राबविण्यात येणार असून या प्रकल्पाला नुकतीच राज्य शासनाकडून मान्यता मिळाली आहे.
याबाबत माहिती देताना रस्ते विकास महामंडळाचे अधीक्षक अभियंता राहुल वसईकर म्हणाले की, लोकप्रिय तीर्थक्षेत्र असल्याने आणि जवळ कार्ला लेणी पर्यटनस्थळ असल्यामुळे या ठिकाणी रोप-वे प्रकल्पाची निर्मिती करण्यात येत आहे. एकवीरा देवी मंदिरात दरवर्षी सात ते आठ लाख भाविक येतात. रोप-वेमुळे एकवीरा मंदिरात भाविकांना सहज पोहोचता येणार आहे.
दरम्यान, एकवीरा देवीचे मंदिर सह्याद्री पर्वताच्या कुशीतील कार्ला येथील डोंगरावर आहे. पायथ्यापासून मंदिरापर्यंत जाण्यासाठी पायर्या चढाव्या लागतात. देवीचे मंदिर डोंगरात असून परिसरात लेणी आहेत. मंदिराचा गाभारा खूप छोटा आहे. हा परिसर देवीच्या दर्शनासह पर्यटनासाठी आणि निसर्गसौंदर्य न्याहाळण्यासाठी उत्तम आहे. त्यामुळे येथे नेहमीच पर्यटकांची गर्दी असते.
