पुणे : कसबा विधानसभा पोटनिवडणुकीसाठी टिळक कुटुंबीयांना उमेदवारी नाकारत ब्राह्मणेतर उमेदवार दिल्याचे तीव्र पडसाद शहरात उमटण्यास सुरुवात झाली आहे. आता ‘आमची ही ठरले, धडा कसा शिकवायचा.. कसबा हा गाडगीळांचा.. कसबा हा बापटांचा.. का काढला आमच्याकडून कसबा.. आम्ही दाबणार नोटा…’ अशा आशयाचा फलक नारायण पेठेतील मोदी गणपती मंदिराबाहेर लावण्यात आला आहे.
आधी ‘कुलकर्णी यांचा मतदारसंघ गेला.. टिळक यांचा मतदारसंघ गेला.. आता नंबर बापट यांचा का?.. समाज कुठवर सहन करणार? अशा आशयाचे सूचक भाष्य करणारे फलक कसबा विधानसभा मतदारसंघात लावण्यात आले होते. या फलकांच्या माध्यमातून ब्राह्मण समाजावर होत असलेल्या अन्यायाबाबत नाराजी व्यक्त करण्यात आली आहे. या फलकाची राजकीय वर्तुळात खमंग चर्चा सुरू झाली आहे.
कसबा पोटनिवडणूक जाहीर झाल्यानंतर दिवंगत आमदार मुक्ता टिळक यांच्या कुटुंबातील व्यक्तींना उमेदवारी मिळावी, अशी मुक्ता टिळक यांचे पती शैलेश टिळक यांनी जाहीर भूमिका घेतली होती. त्यांना किंवा मुलगा कुणाल याला भाजपकडून तिकीट मिळेल, अशी अपेक्षा असतानाच भाजपने माजी नगरसेवक हेमंत रासने यांना उमेदवारी जाहीर केली. त्यानंतर सातत्याने कसब्यातील विविध भागात असे फलक लावण्यात येत आहेत.
दरम्यान, हिंदू महासंघानेही ब्राह्मण उमेदवार न दिल्याबद्दल नाराजी व्यक्त करत निवडणुकीच्या रिंगणात उतरण्याची घोषणा केली. कसब्यातून टिळकांना उमेदवारी नाकारण्यात आली. सध्या ब्राह्मण समाजाचा एकही आमदार नाही. ब्राह्मण समाजावर आरोप होतात, तेव्हा त्याचे उत्तर देणारा प्रतिनिधी आवश्यक आहे, असे हिंदू महासंघाचे अध्यक्ष आनंद दवे यांनी सांगत हिंदू महासंघाकडून दवे यांनी अपक्ष अर्ज दाखल केला आहे.
