रायगड : “राज्यपालपदावर विराजमान असलेली व्यक्ती जर असं वक्तव्य करत असेल तर शिवरायांचा महाराष्ट्र त्यांना माफ करणार नाही. आझाद मैदान लांब नाही. एक तारीख ठरवून मुंबईच्या आझाद मैदानावर जायचं. तेव्हा तयारीला लागा”, असं म्हणत उदयनराजेंनी पुढच्या मोर्चाची घोषणा केली.
राज्यपाल भगतसिंह कोश्यारी यांनी छत्रपती शिवाजी महाराज यांच्याबाबत केलेल्या आक्षेपार्ह विधानाचे अजूनही पडसाद पडत आहेत. अशातच छत्रपती शिवाजी महाराज यांचे वंशज छत्रपती उदयनराजे यांनी आज रायगडावर ‘निर्धार शिवसन्मानाचा’ मेळाव्याचे आयोजन केले होते. यावेळी त्यांनी राज्यपाल यांनी केलेल्या व्यक्तव्याचा समाचार घेताना राज्यपालांना हटविण्याच्या मागणी केली.
“शिवाजी महाराजांचा सन्मान करण्यासाठी आपण सर्वजण एकत्र जमलो आहोत. आजचा दिवस इतिहासात लिहून ठेवण्यासाखा दिवस आहे. महाराजांच्या सन्मानासाठी इथून पुढेही आपल्याला लढा द्यायचा आहे. आता पुढची लढाई आझाद मैदानावर”, असं छत्रपती उदयनराजे यांनी स्पष्ट करताना कार्यकर्त्यांना तयारीला लागण्याचे आदेश दिले आहेत.
केवळ शिवाजी महाराजच नाही तर ज्योतिबा फुले आणि सावित्रीबाईंचा अवमान राज्यपालांनी केला आणि अपमान पाहत बसलो आहोत. महाराजांचा अवमान हा आपला अपमान वाटत नाही का? आपण काही करणार आहोत की नाही? या राजकारण्यांच्या किती दिवस तावडीत राहणार? आज हा देश विकृत लोकांच्या तावडीत गेला. हे सांगताना खंत वाटते, असे म्हणत छत्रपती उदयनराजेंनी आपल्या वेदना बोलून दाखवल्या.
