मुंबई: नगर परिषद आणि नगर पंचायतीच्या निवडणुकांसाठी आज सकाळपासून मतदान सुरू झाले आहे. शांततापूर्ण वातावरणात मतदान प्रक्रिया सुरू असतानाच, काही भागांमध्ये निवडणुकीच्या नियमांचे उल्लंघन झाल्याचे गंभीर प्रकार समोर आले आहेत.
बुलढाणा जिल्ह्यातील नांदुरा येथील प्रभाग क्रमांक 10 मध्ये मतदारांना पैशांचे आमिष दाखवून मतदारांना खुश करण्याचा प्रयत्न करण्यात आला. समोर आलेल्या माहितीनुसार उमेदवारांचे नातेवाईक मतदारांना थेट पैसे देताना दिसून आले होते.
चंद्रपूर जिल्ह्यातील राजुरा येथे नगरपालिकेच्या प्रभाग क्रमांक 4 मधील भारतीय जनता पक्षाचे नगरसेवक पदाचे उमेदवार अमोल चिल्लावार यांचे वडील आणि स्थानिक भाजप नेते पांडूरंग चिल्लावार हे मतदारांना पैसे वाटत असल्याचा धक्कादायक प्रकार उघड झाला आहे. पिठाच्या चक्कीच्या शेडमधून मतदारांना पैसे दिले जात असल्याचा आरोप काँग्रेस पक्षाचे नेते सुरज ठाकरे यांनी केला आहे.
दरम्यान, पोलिसांनी नगरपालिका निवडणुकीच्या पार्श्वभूमीवर 7 लाख रुपयांचा देशी-विदेशी दारूचा साठा पंढरपूरमधून मतदानापूर्वी जप्त केला आहे. मतदारांना प्रभावित करण्याच्या या प्रयत्नांवर निवडणूक आयोग काय भूमिका घेते, याकडे सर्वांचे लक्ष लागले आहे.
