बारामती : बारामतीमधील सोमेश्वर सहकारी साखर कारखान्याच्या वतीने चालवण्यात येणाऱ्या सोमेश्वर शिक्षण प्रसारक मंडळाच्या अभियांत्रिकी आणि व्यवस्थापन महाविद्यालयाला शरद पवार यांचे नाव दिल्याने शेतकरी कृती समितीचे अध्यक्ष सतीश काकडे यांनी आक्षेप घेतला आहे. शरद पवार यांचे कॉलेजला दिलेले नाव काढण्यात यावे. पवार कुटुंबियांचा कारखान्याशी काहीही संबंध नसताना त्यांचं नाव कॉलेजला का द्यायचं, असा सवाल सतीश काकडे यांनी उपस्थित केला आहे.
सतीश काकडे यांनी सागितले की, शरद पवार यांचे नाव द्यायला आमचा विरोध नाही. परंतु ते नाव देताना कारखान्याच्या संचालक मंडळाने सभासदांना विश्वासात घेतले नाही. संचालक मंडळाने नामांतराचा विषय कारखान्याच्या वार्षिक सर्वसाधारण सभेत मांडायला हवा होता. परंतु संचालक मंडळाने जनरल बॉडीत हा निर्णय २०१९ साली घेतला आणि हे शेतकऱ्यांना म्हणजे ऑक्टोबर २०२२ मध्ये कळले, असे सतीश काकडे यांनी सागितले.
दरम्यान, शरद पवार यांनी पवार ट्रस्टच्या माध्यमातून शिक्षण संस्थेला तीन कोटी रुपये दिल्याने त्यांचे नाव देण्यात आले आहे. परंतु शेतकऱ्यांच्या ऊस बिलातून शिक्षण निधी म्हणून जवळपास ७०ते ७५ कोटी रुपये निधी घेतला आहे. शरद पवारांनी ट्रस्टच्या माध्यमातून कोटी रुपये दिले म्हणून त्याचे नाव द्यायचं का असा सवाल काकडे यांनी केला आहे. त्यामुळे शरद पवारांचे महाविद्यालयाला दिलेले नाव काढावे, अशी मागणी काकडे यांनी केली.
