Delhi bomb blast : दिल्लीतील लाल किल्ल्याजवळ 10 नोव्हेंबर रोजी झालेल्या भीषण कार स्फोटातील कथित ‘सुसाइड बॉम्बर’ डॉ. उमर नबीचा (Umar Nabi) आणखी एक महत्त्वपूर्ण व्हिडिओ तपास यंत्रणांच्या हाती लागला आहे. हा व्हिडिओ स्फोटाच्या काही दिवस आधी रेकॉर्ड करण्यात आला होता. यामध्ये उमरने आत्मघाती हल्ल्यांसंदर्भात त्यांच्या नियोजनाची माहिती दिली आहे, असे तपास यंत्रणांनी स्पष्ट केले आहे. (Umar Nabi Viral Video)
व्हिडिओमध्ये उमर नबी काय म्हणतोय?
व्हिडिओमध्ये उमर नबी आत्मघाती हल्ल्यांविषयी भाष्य करताना दिसत आहे. तो म्हणतो की, “इस्लाममध्ये ‘सुसाइड’ निषिद्ध आहे, पण बॉम्बस्फोटांना परवानगी आहे.” असे तो म्हणतो.
या हल्ल्याच्या मानसिकतेबद्दल बोलताना तो पुढे म्हणाला, “आत्मघाती हल्ल्यांमधील सर्वात मोठी समस्या म्हणजे जेव्हा एखाद्या व्यक्तीला एका विशिष्ट वेळी, विशिष्ट ठिकाणी मरणार आहे, असा विश्वास असतो. तेव्हा तो अत्यंत गंभीर मानसिकतेत जातो. त्याला वाटते की मृत्यू हेच त्याचे एकमेव अंतिम स्थान आहे.”
पहा Video…
लोकशाही व्यवस्थेवर टीका
याच व्हिडिओमध्ये उमरने लोकशाही आणि मानवीय व्यवस्थेवर टीका केली आहे. तो म्हणतो, “मात्र, वास्तविक परिस्थिती अशी आहे की, असा विचार किंवा अशी परिस्थिती कोणत्याही लोकशाही आणि मानवीय व्यवस्थेत स्वीकारली जाऊ शकत नाही. कारण हे जीवन, समाज आणि कायद्याच्या मूलभूत तत्वांच्या विरुद्ध आहे.”
स्फोटात 15 जणांचा मृत्यू
10 नोव्हेंबर रोजी लाल किल्ल्याजवळ एका कारमध्ये स्फोट झाला होता. यामध्ये सुरुवातीला 12 जणांचा मृत्यू झाला, तर उपचारादरम्यान आणखी तिघांनी आपला जीव गमावला. त्यामुळे मृतांचा आकडा 15 वर पोहोचला आहे. जखमींवर अजूनही उपचार सुरू असून, त्यांची प्रकृती गंभीर असल्याची माहिती समोर येत आहे.
