गोवा: दक्षिण गोव्यातील वास्को परिसरातून एक अत्यंत (Shocking News) संतापजनक आणि माणुसकीला काळीमा फासणारी घटना समोर आली आहे. एका भाजप नगरसेवकाच्या मुलाने गेल्या तीन वर्षांपासून तब्बल २५ ते ३० अल्पवयीन मुलींचे लैंगिक शोषण केल्याचा धक्कादायक प्रकार उघडकीस आला असून, पोलिसांनी आरोपी सोहम नाईक याला बेड्या ठोकल्या आहेत. (Latest Marathi News)
आरोपी सोहम नाईक हा एका भाजप नगरसेवकाचा मुलगा असून, त्याने आपल्या राजकीय वजनाचा आणि ओळखीचा गैरफायदा घेत अनेक अल्पवयीन मुलींना आपल्या जाळ्यात ओढले. गेल्या तीन वर्षांपासून तो या मुलींशी शारीरिक संबंध ठेवत होता. अत्यंत घृणास्पद बाब म्हणजे, शारीरिक शोषणावेळी तो या मुलींचे गुपचूप अश्लील व्हिडिओ रेकॉर्ड करत असे. या व्हिडिओंनी तो पीडित मुलींना ब्लॅकमेल करायचा आणि कोणाकडेही तोंड न उघडण्यासाठी त्यांना धमकावायचा.
हा भयंकर प्रकार गेल्या आठवड्यात एका पार्टीदरम्यान उघड झाला. आरोपी सोहम नाईक याने मद्यधुंद अवस्थेत आपल्या कृत्यांची फुशारकी मारत आपल्या मोबाईलमधील अश्लील व्हिडिओ मित्रांना दाखवले. ही माहिती वाऱ्यासारखी पसरली आणि काही पीडित मुलींच्या कुटुंबीयांपर्यंत पोहोचली. त्यानंतर या प्रकरणाला वाचा फुटली.
ही घटना समजताच संपूर्ण दक्षिण गोव्यात संतापाची लाट उसळली. संतप्त नागरिकांनी वास्को पोलीस ठाण्याला घेराव घातला आणि आरोपीला तात्काळ अटक करण्याची मागणी केली. सुरुवातीला राजकीय दबावामुळे कारवाईत उशीर होत असल्याचा आरोप स्थानिकांनी केला, मात्र जनक्षोभ वाढल्याने पोलिसांनी रविवारी रात्री उशिरा सोहम नाईकला अटक केली.
पोलिसांनी आरोपीचा मोबाईल जप्त केला असून, त्यामध्ये अनेक पीडित मुलींचे अश्लील व्हिडिओ सापडल्याची प्राथमिक माहिती आहे. या प्रकरणात सोहमला कोणाची साथ लाभली होती का? आणि यामागे मोठे रॅकेट आहे का? याचा शोध पोलीस घेत आहेत. या घटनेमुळे पालकांमध्ये भीतीचे वातावरण पसरले असून, नराधम सोहम नाईकला फाशीची शिक्षा व्हावी, अशी मागणी जोर धरत आहे.
