Crime News: मुंबई : मुंबईच्या मुलुंड परिसरात रविवारी भरदिवसा झालेल्या एका हल्ल्यामुळे मोठी खळबळ उडाली आहे. मुलुंडमधील साईप्रेस आणि मुलुंड कॉलनी भागात दोन गटांमध्ये झालेल्या वादातून तिघांवर धारदार शस्त्राने प्राणघातक हल्ला करण्यात आला. या घटनेचे सीसीटीव्ही फुटेज समोर आले असून त्यामध्ये आरोपी भररस्त्यात शस्त्राने वार करताना दिसत आहेत. या हल्ल्यात तिघेही जण गंभीर जखमी झाले असून त्यांच्यावर सध्या रुग्णालयात उपचार सुरू आहेत. या घटनेनंतर परिसरात काही काळ भीतीचे आणि तणावाचे वातावरण निर्माण झाले होते.
पोलिसांनी या प्रकरणात तातडीने कारवाई करत दोन मुख्य आरोपींना अटक केली आहे. सुलतान मलिक आणि महीपाल सिंह अशी या अटक करण्यात आलेल्या आरोपींची नावे आहेत. पोलीस तपासात या प्रकरणाला राजकीय वळण लागल्याचे दिसून येत आहे. अटक करण्यात आलेला सुलतान मलिक हा अजित पवार गटाचे नेते सज्जू मलिक यांचे भाऊ युसुफ मलिक यांचा मुलगा असल्याची माहिती समोर आली आहे. या राजकीय कनेक्शनमुळे संपूर्ण मुंबईत या घटनेची जोरदार चर्चा सुरू झाली आहे.
प्राथमिक माहितीनुसार, हा हल्ला जुन्या वादातून किंवा पूर्ववैमनस्यातून झाला असावा असा अंदाज पोलिसांनी वर्तवला आहे. अटक केलेल्या दोन्ही आरोपींना न्यायालयात हजर केले असता, न्यायालयाने त्यांना 25 मार्चपर्यंत पोलीस कोठडी सुनावली आहे. भरचौकात अशा प्रकारे शस्त्र काढून हल्ला झाल्यामुळे नागरिकांच्या सुरक्षेचा प्रश्न पुन्हा एकदा ऐरणीवर आला आहे. या गुन्ह्यात आणखी कोणाचा सहभाग आहे का आणि हल्ल्यामागचे नेमके मुख्य कारण काय होते, याचा सखोल तपास पोलीस करत आहेत.
