मुंबई: भारतात कोविड-१९ प्रकरणांमध्ये वाढ झाल्याचे दिसून आले आहे. केंद्रीय आरोग्य मंत्रालयाच्या आकडेवारीनुसार, सध्या देशात १२०० सक्रिय रुग्ण आहेत, ज्यामध्ये केरळ, महाराष्ट्र, दिल्ली, गुजरात आणि तामिळनाडू ही सर्वात जास्त बाधित राज्ये आहेत. ओमिक्रॉनच्या JN.1 चा उप-प्रकार, NB.1.8.1 हा नवीन प्रकार भारतात आढळून आला आहे. सिंगापूर, हाँगकाँग आणि युनायटेड स्टेट्ससह अनेक देशांमध्ये हाच प्रकार आढळून आला आहे. सक्रिय रुग्णांच्या बाबतीत महाराष्ट्र दुसऱ्या क्रमांकावर असून राज्यात एकूण 325 रुग्ण आहेत. त्यापैकी 316 रुग्ण मुंबईतील आहे. देशात एकूण 11 रुग्णांचा मृत्यू झाला आहे.
सिंगापूरमध्ये, आरोग्य अधिकाऱ्यांनी सांगितले की JN.1 चे दोनप्रकार – LF.7 आणि NB.1.8.1 हे आहेत.आता स्थानिक प्रकरणांपैकी दोन तृतीयांश पेक्षा जास्त याच विषाणूची लागण झाली आहे. दरम्यान, देशात चार नवीन प्रकार आढळले असून LF.7, XFG, JN.1 आणि NB.1.8.1 या प्रकारचे विषाणू आहेत.
आरोग्य तज्ञ लोकांना मास्क घालणे, नियमित हात स्वच्छता आणि लक्षणे निरीक्षण करणे यासह खबरदारी घेण्याचा सल्ला देत आहेत. नागरिकांना गर्दीच्या ठिकाणी जाणे टाळण्याचा आणि लक्षणे कायम राहिल्यास वैद्यकीय मदत घेण्याचा सल्ला दिला जातो.
सरकार परिस्थितीवर बारकाईने लक्ष ठेवून आहे आणि विषाणूचा प्रसार रोखण्यासाठी आवश्यक उपाययोजना करत आहे. आरोग्य अधिकारी नवीन प्रकाराचा प्रसार रोखण्यासाठी काम करत आहेत.
