इंदूर: राजा रघुवंशी हत्येप्रकरणी धक्कादायक खुलासे समोर येत आहेत. ट्रान्सपोर्ट व्यावसायिक राजा रघुवंशी यांचा मृतदेह मेघालयच्या एका निर्जन ठिकाणी आढळून आल्यानंतर, पोलिसांनी केलेल्या तपासात, हत्येमागे राजाची पत्नी सोनम रघुवंशी हिच मुख्य सूत्रधार असल्याचे धक्कादायक सत्य समोर आले आहे. पोलिसांनी दिलेल्या माहितीनुसार, सोनम आणि राजाची ओळख एका मॅट्रिमोनियल ॲपद्वारे झाली होती आणि अवघ्या काही महिन्यांच्या ओळखीनंतर ११ मे रोजी त्यांचे लग्न झाले. मात्र, पूर्वीपासून सोनमचे राज कुशवाह नावाच्या तरुणासोबत प्रेमसंबंध होते आणि हे संबंध लग्नानंतरही सुरूच राहिले. याच अनैतिक संबंधातून राजाला कायमचे संपवण्याचा भयावह कट रचला गेला. राजा रघुवंशीची हत्या करून लुटीमारीच्या उद्देशाने हत्या झाली असे भासवू. त्यानंतर मी विधवा झाल्यानंतर पप्पा राज कुशवाहसोबत लग्न करण्यास परवानगी देतील, असे सोनमला वाटत होते. त्यामुळे राजाची हत्या करण्यात आली.
१६ मे रोजी रचला हत्येचा कट
लग्नानंतर अवघ्या पाचव्या दिवशी, म्हणजे १६ मे रोजी सोनमने प्रियकर राज कुशवाहच्या मदतीने राजाच्या हत्येची संपूर्ण योजना आखली. राजाला हनिमूनसाठी शिलाँगला घेऊन जाण्यात आले. राजा हनिमून समजून आनंदाने प्रवासाला निघाला होता, तर दुसरीकडे सोनम मात्र त्याच्या हत्येसाठी योजना आखत होती.
सोनमने योजनेनुसार तीन जणांना आधीच गुवाहाटीला पाठवले होते. त्यानंतर ऑनलाइन पद्धतीने एक लहान कुऱ्हाड मागवली, ज्याचा वापर राजाच्या हत्येसाठी करण्यात आला. २३ मे रोजी सोनमने राजाला ‘फोटोशूट’ करायच्या बहाण्याने एका टेकडीवर नेले. टेकडीवर चढताना थकल्याचे नाटक करत ती मागे राहिली, योग्य संधी साधून सोनमने मागून आदेश दिला, “त्याला संपवा!” आणि त्याच क्षणी कुऱ्हाडीने राजाची निर्घृण हत्या करण्यात आली.
सोनमने आरोपींना आधी १५ हजार रुपये दिले होते. हत्येच्या वेळी आणखी ३५ हजार रुपये रोख देण्यात आले. काम पूर्ण झाल्यावर २० लाख रुपये देण्याचे आश्वासनही सोनमने दिले होते.
राजाचा खून केल्यानंतर सोनम गुवाहाटीमार्गे वाराणसी आणि नंतर गाजीपूरला पोहोचली, तिथून नेपाळमार्गे पलायनाची तयारी करत होती. प्रियकर राज कुशवाहला इंदूरमधून अटक करण्यात आली आणि त्यानंतर सोनमने गाजीपूरमध्ये पोलिसांसमोर आत्मसमर्पण केले.
