नवी दिल्ली: लहान मुलांच्या आरोग्याच्या दृष्टीने केंद्र सरकारने महत्त्वाचा निर्णय घेतला आहे. सर्दी, खोकला आणि अॅलर्जीच्या लक्षणांवर वापरल्या जाणाऱ्या काही औषधांच्या फिक्स्ड डोस कॉम्बिनेशनवर निर्बंध आणण्यात आले आहेत. विशेषतः 4 वर्षांपेक्षा कमी वयाच्या मुलांना या औषधांचा वापर करू नये, असे स्पष्ट करण्यात आले आहे.
या औषधांच्या पाकिटांवर लहान मुलांसाठी वापर करू नये, असा स्पष्ट इशारा देणे उत्पादकांसाठी आवश्यक करण्यात आले आहे. तज्ज्ञ समिती आणि ड्रग्ज टेक्निकल अॅडव्हायझरी बोर्डच्या शिफारसीनंतर हा निर्णय घेण्यात आला आहे.
तज्ज्ञांच्या अभ्यासात चार वर्षांखालील मुलांसाठी या औषधांमधील काही घटकांमुळे आरोग्यावर गंभीर परिणाम होण्याची शक्यता व्यक्त करण्यात आली होती. तसेच, लहान मुलांच्या सर्दी आणि अॅलर्जीवर उपचार करण्यासाठी इतर सुरक्षित पर्याय उपलब्ध असल्याने संबंधित कॉम्बिनेशनच्या वापरावर निर्बंध आणण्यात आले.
या निर्णयाआधीही सरकारने 15 एप्रिल 2025 रोजी अधिसूचना काढून या औषधांबाबत काही मर्यादा लागू केल्या होत्या. आता मात्र संबंधित दोन घटक असलेल्या विविध सिरप आणि औषधांच्या कॉम्बिनेशनवर अधिक कडक निर्बंध लागू करण्यात आले आहेत.
यामध्ये Chlorpheniramine Maleate आणि Phenylephrine Hydrochloride या दोन घटकांचा समावेश आहे. Chlorpheniramine Maleate हे अॅलर्जीची लक्षणे कमी करण्यासाठी वापरले जाते. शिंका येणे, नाक वाहणे, घशात खाज आणि डोळ्यांतून पाणी येणे यांसारख्या त्रासात त्याचा उपयोग केला जातो.
तर Phenylephrine Hydrochloride हे नाकातील सूज कमी करून नाक मोकळे करण्यासाठी वापरले जाणारे औषध आहे. आरोग्य विभागाने पालकांना विशेष काळजी घेण्याचे आवाहन केले आहे. लहान मुलांना डॉक्टरांच्या सल्ल्याशिवाय कोणतेही कफ सिरप किंवा सर्दीचे औषध देऊ नये, असा सल्ला देण्यात आला आहे.
