छत्रपती संभाजीनगर: खवड्या डोंगरावर घडलेल्या दुर्दैवी घटनेत चांदगुडे कुटुंबातील मुरलीधर चांदगुडे, त्यांची पत्नी संगीता आणि मुलगा कुणाल या तिघांचा मृत्यू झाला. या घटनेनंतर कुटुंबातील जुन्या वादांची आणि कौटुंबिक तणावाची चर्चा सुरू झाली आहे. मात्र या वादांचा दुर्घटनेशी थेट संबंध असल्याचे अद्याप स्पष्ट झालेले नाही.
शुक्रवारी रात्री धनगरपिंपळगाव परिसरातील शिवलाल वस्ती येथे मुरलीधर यांच्यावर अंत्यसंस्कार करण्यात आले. तर कुणाल आणि संगीता यांचे मृतदेह त्यांच्या नातेवाईकांनी मुकुंदवाडी येथे नेले. त्यामुळे तिघांचे अंत्यसंस्कार वेगवेगळ्या ठिकाणी का करण्यात आले, असा प्रश्न उपस्थित झाला.
ग्रामस्थांच्या माहितीनुसार, मुरलीधर यांनी सुमारे 20 वर्षांपूर्वी कुटुंबाच्या इच्छेविरुद्ध लग्न केले होते. त्यानंतर जमीन आणि कुटुंबातील वाटणीच्या मुद्द्यावरून घरात मतभेद असल्याचे सांगितले जाते. मुरलीधर यांच्या वडिलांनी काही जमीन त्यांच्या मुलींनाही दिल्याने या विषयावर पती-पत्नीमध्ये वाद होत असल्याचा दावा ग्रामस्थांनी केला आहे. या वातावरणाचा कुणालवर मानसिक परिणाम झाला होता, अशी चर्चाही गावात आहे.
दरम्यान, संगीता चांदगुडे यांचे जुने YouTube व्हिडिओ सोशल मीडियावर समोर आले आहेत. या व्हिडिओंमध्ये त्यांनी पती आणि नणंदेसोबतच्या वादांबाबत नाराजी व्यक्त केल्याचे दिसते. एका व्हिडिओमध्ये मुलाच्या शिक्षणाचा मुद्दा मांडत त्यांनी कुटुंबातील व्यक्तींवर टीका केली होती. दुसऱ्या व्हिडिओमध्ये त्यांनी पतीच्या कठीण काळात साथ दिल्याचा उल्लेख करत कौटुंबिक नात्यांबाबत प्रश्न उपस्थित केले होते.
दुसरीकडे, संगीता यांनी मुलगा कुणालसोबतचे अनेक भावनिक क्षणही सोशल मीडियावर शेअर केले होते. त्यामुळे त्यांच्या माय-लेकाच्या नात्याचीही चर्चा होत आहे. या दुर्घटनेनंतर समोर आलेल्या कौटुंबिक वादाच्या माहितीकडे सध्या केवळ स्थानिकांचे दावे आणि सोशल मीडिया व्हिडिओ म्हणून पाहिले जात आहे. या सर्व बाबींची अधिकृत माहिती तपासानंतरच स्पष्ट होणार आहे.
