Israel News: जगभरात इराण, इस्रायल आणि अमेरिकेमधील तणावाच्या पार्श्वभूमीवर विविध अफवा आणि चुकीची माहिती सोशल मीडियावर वेगाने पसरताना दिसत आहे. अलीकडेच इस्रायलचे पंतप्रधान बेंजामिन नेतन्याहू यांच्या मृत्यूबाबत एक अफवा सोशल मीडियावर मोठ्या प्रमाणात व्हायरल झाली. या दाव्यांमुळे काही काळ संभ्रमाचे वातावरण निर्माण झाले. मात्र इस्रायल सरकारने या सर्व बातम्या खोट्या असल्याचे स्पष्ट केले आहे.
मिळालेल्या माहितीनुसार, काही दिवसांपासून सोशल मीडियावर एक व्हिडिओ मोठ्या प्रमाणात शेअर केला जात आहे. या व्हिडिओमध्ये नेतन्याहू यांच्या हत्येचा दावा करण्यात आला होता. हा व्हिडिओ कृत्रिम बुद्धिमत्तेच्या मदतीने तयार केलेला असल्याची शक्यता व्यक्त करण्यात येत आहे. अनेकांनी हा व्हिडिओ खरा असल्याचा दावा करत विविध प्रकारच्या पोस्ट शेअर केल्या. त्यामुळे जगभरात या बातमीबाबत चर्चा सुरू झाली.
या पार्श्वभूमीवर इस्रायल सरकारने अधिकृत प्रतिक्रिया देत अशा सर्व दाव्यांना फेटाळून लावले. पंतप्रधान बेंजामिन नेतन्याहू सुरक्षित असून त्यांच्या मृत्यूबाबत पसरवण्यात आलेली माहिती पूर्णपणे चुकीची असल्याचे स्पष्ट करण्यात आले. त्यानंतर या अफवांवर काही प्रमाणात पडदा पडला.
दरम्यान, नेतन्याहू यांनी स्वतः शुक्रवारी आपल्या एक्स या सोशल मीडिया प्लॅटफॉर्मवर एक व्हिडिओ शेअर केला होता. या व्हिडिओमध्ये ते युद्धस्थितीबाबत पत्रकार परिषदेत प्रतिक्रिया देताना दिसत आहेत. हा व्हिडिओ समोर आल्यानंतरही सोशल मीडियावर वेगवेगळ्या चर्चा सुरू झाल्या. काही वापरकर्त्यांनी या व्हिडिओमध्ये त्यांच्या हाताला सहा बोटे दिसत असल्याचा दावा करत हा व्हिडिओ एआयच्या मदतीने तयार करण्यात आला असावा असा संशय व्यक्त केला.
याच दरम्यान अमेरिकेतील काही राजकीय विश्लेषकांनीही सोशल मीडियावर प्रश्न उपस्थित केले. अमेरिकन कमेंटेटर कॅन्डेस ओवेन्स यांनी एक्सवर पोस्ट करत नेतन्याहू कुठे आहेत असा सवाल उपस्थित केला. त्यांच्या या पोस्टनंतर सोशल मीडियावर चर्चा अधिक वाढली. मात्र अधिकृत स्तरावर नेतन्याहू सुरक्षित असल्याचे स्पष्ट करण्यात आले आहे. सोशल मीडियावर पसरत असलेल्या अप्रमाणित माहितीवर विश्वास ठेवू नये, असेही आवाहन करण्यात आले आहे.
