इराण: अमेरिका आणि इराण यांच्यातील शांतता चर्चा पूर्णपणे अयशस्वी ठरली असून, आखाती प्रदेशात युद्धाचा मोठा धोका निर्माण झाला आहे. गुरुवारी पहाटे इराणने अमेरिकेच्या हवाई तळावर क्षेपणास्त्रे डागून जोरदार प्रत्युत्तर दिले. या संघर्षाची सुरुवात बुधवारी मध्यरात्री झाली. इराणच्या बंदर अब्बास शहराच्या जवळ अमेरिकेने अचानक हवाई हल्ला केला होता. अमेरिकेच्या मते, होर्मुझ सामुद्रधुनीतून जाणाऱ्या त्यांच्या लष्करी आणि मालवाहू जहाजांना इराणच्या ठिकाणावरून धोका निर्माण झाला होता, म्हणून त्यांनी स्वतःच्या बचावासाठी हा हल्ला केला. इराणच्या इस्लामिक रिव्होल्युशनरी गार्ड कॉर्प्सने (IRGC) या हल्ल्याची जबाबदारी स्वीकारली आहे. अमेरिकेने केलेल्या कारवाईला हे उत्तर असल्याचे इराणने म्हटले आहे.
इराणने आक्रमक पवित्रा घेत अमेरिकेला थेट इशारा दिला आहे. इराणने स्पष्ट केले आहे की, जर अमेरिकेने पुन्हा अशी कृती केली, तर यापेक्षाही मोठा आणि विनाशकारी हल्ला केला जाईल.
या तणावाचा फटका शेजारील देशांनाही बसत आहे. कुवैतने आपल्या हवाई हद्दीत प्रवेश करणारी अनेक क्षेपणास्त्रे आणि ड्रोन नष्ट केल्याची माहिती दिली आहे. या घटनेमुळे संपूर्ण आखाती देशांमध्ये घबराटीचे वातावरण असून कुवैतने आपल्या सीमांवर हायअलर्ट जारी केला आहे. दोन्ही देशांमधील या वाढत्या संघर्षाकडे जगाचे लक्ष लागले असून, आखातात युद्धाचे काळे ढग गडद झाले आहेत. इराणने दिलेल्या इशाऱ्यामुळे आता अमेरिका काय भूमिका घेते, याकडे सर्वांचे लक्ष लागले आहे.
