तेहरान: इराण आणि अमेरिका यांच्यातील (Iran Attack US) संघर्ष अधिक वाढला आहे. इस्रायल आणि अमेरिकेने इराणच्या तेलसाठ्यांना लक्ष्य केल्यानंतर, आठव्या दिवशी इराणने पलटवार केला आहे. बहरीनमध्ये तैनात असलेल्या अमेरिकेच्या अत्यंत शक्तिशाली अशा ‘पाचव्या नौदलाच्या’ मुख्यालयावर इराणने क्षेपणास्त्र हल्ला केल्याने संपूर्ण जगात खळबळ उडाली आहे.
गेल्या काही दिवसांपासून इस्रायल-अमेरिका आणि इराण यांच्यात युद्ध सुरू आहे. अमेरिकेने इराणच्या नाड्या आवळण्यासाठी त्यांच्या तेल साठ्यांवर हल्ले चढवले होते. याचा बदला म्हणून इराणने थेट अमेरिकेच्या मध्य पूर्वेतील लष्करी ताकदीचा कणा मानल्या जाणाऱ्या ‘पाचव्या आरमाराला’ लक्ष्य केले. बहरीनची राजधानी मनामा येथील ‘जुफेर’ परिसरात असलेल्या या तळाला इराणने लक्ष्य केले. इराणच्या दाव्यानुसार, या हल्ल्यात २१ अमेरिकन सैनिक ठार झाले असून अनेक जण गंभीर जखमी आहेत.
या संघर्षामुळे कच्च्या तेलाच्या पुरवठ्यात अडथळा निर्माण झाला असून, आंतरराष्ट्रीय बाजारात पेट्रोल-डिझेलच्या किमती गगनाला भिडण्याची शक्यता आहे. इराणने थेट अमेरिकन तळाला लक्ष्य केल्यामुळे आता अमेरिका कोणत्या थराला जाऊन उत्तर देणार, याकडे जगाचे लक्ष लागले आहे. दरम्यान, हा संघर्ष रशिया-चीन आणि युरोपीय देशांनाही यात ओढू शकतो.
