हाँगकाँग: हाँगकाँगमध्ये (Hong Kong Fire) गगनचुंबी इमारतीला आग लागल्याची दुर्घटना समोर आली आहे. न्यू टेरिटरीजमधील ताई पो येथे असलेल्या वांग फुक कोर्ट निवासी संकुलात लागलेल्या भीषण आगीत आतापर्यंत 44 जणांचा मृत्यू झाला असून, अजूनही 280 हून अधिक रहिवासी बेपत्ता असल्याची धक्कादायक माहिती समोर आली आहे. या आगीचे नेमके कारण काय आहे, याचा शोध अग्निशमन दलाचे अधिकारी घेत आहेत.
अहवालानुसार, इमारतीचे बांबूचे तात्पुरते बांधकाम आग वेगाने पसरण्यास कारणीभूत ठरले असावेत. ही आग वांग फुक कोर्ट संकुलातील 31 मजली आठ टॉवर्सपैकी एका टॉवरला लागली, जिथे अंदाजे 4,800 रहिवासी राहतात. हॉलवे आणि स्टायरोफोममुळे आग अनेक मजल्यांवर झपाट्याने पसरली.
पोलिसांनी केलेल्या प्राथमिक तपासामध्ये, इमारती संरक्षक जाळ्यांनी आणि प्लास्टिकने वेढलेल्या असल्याचे आढळले. एका इमारतीच्या दुरुस्तीचे काम करताना खिडक्या फोमने सील केल्याचेही आढळून आले. अशा प्रकारे ज्वलनशील वस्तूंचा वापर करणे, हे अपघाताची तीव्रता वाढवणारे ठरले.
हाँगकाँगमध्ये आजही परंपरेनुसार उंच इमारतींच्या बांधकामात मोठ्या प्रमाणावर बांबूचा वापर केला जातो. यामुळे, सरकारने मार्चमध्येच बांबूऐवजी अग्निरोधक स्टील वापरण्याची योजना जाहीर केली आहे.
