दिल्ली : देशाच्या नव्या निवडणूक आयुक्तांच्या नावाची घोषणा करण्यात आली आहे. ज्येष्ठ सनदी अधिकारी ज्ञानेश कुमार हे आता देशाचे नवे मुख्य निवडणूक आयुक्त असतील. सध्याचे मुख्य निवडणूक आयुक्त राजीव कुमार यांच्याकडून 19 फेब्रुवारी रोजी ते पदभार स्वीकारणार आहेत. पंतप्रधान नरेंद्र मोदी यांच्या अध्यक्षतेखालील तीन सदस्यीय निवड समितीने ज्ञानेश कुमार यांच्या नावाला मंजूरी दिली आहे. विधी व न्याय मंत्रालयाकडून याबाबतचा शासन निर्णय सोमवारी (ता.17) रात्री काढण्यात आला आहे.

ते 26 जानेवारी 2029 पर्यंत या पदाचा कारभार सांभाळणार आहेत. ज्ञानेश कुमार या वर्षाच्या शेवटी होणाऱ्या बिहार विधानसभा निवडणुका तर पुढील वर्षी होणाऱ्या बंगाल, आसाम आणि तामिळनाडूच्या निवडणुकांवर देखरेख करतील.
1988 च्या बॅचचे केरळ केडरचे आयईएस अधिकारी असलेल्या ज्ञानेश कुमार यांनी आयआयटी कानपूरमधून सिव्हिल इंजिनिअरिंगमध्ये बी.टेक केलं आहे. त्यांनी राम मंदिर निर्माण समितीवर देखील काम केलं आहे.

लोकसभेचे विरोधी पक्षनेते राहुल गांधी असहमत
लोकसभेचे विरोधी पक्षनेते राहुल गांधी नव्या निवडणूक आयुक्तांच्या निवडीवर समाधानी नाहीत. त्यांनी असहमत असल्याची नोट पाठवली आहे. सुप्रीम कोर्टात या विषयी सुनावणी सुरु असल्याने त्यांनी बैठक स्थगित करण्याची मागणी करण्यात आली होती. अधिसूचना जारी होण्याआधी PMO मध्ये निवड समितीची बैठक झाली.
या बैठकीला पीएम मोदी, अमित शाह आणि लोकसभेचे विरोधी पक्षनेते राहुल गांधी उपस्थित होते. मुख्य निवडणूक आयुक्ताच्या नियुक्तीसाठी मोदी सरकारने जी तत्परता दाखवली, त्यावर काँग्रेसने प्रश्न उपस्थित केले आहेत. सुप्रीम कोर्टात या संबंधी 19 फेब्रुवारीला सुनावणी होणार आहे. त्या पार्श्वभूमीवर काँग्रेसने बैठक स्थगित करण्याची मागणी केली होती.







