मुंबई : दिवाळी आणि लग्नसराईच्या पार्श्वभूमीवर सोन्या-चांदीची खरेदी करण्याचा विचार करणाऱ्या ग्राहकांसाठी दिलासादायक बातमी आहे. देशातील सराफा बाजारात सोनं आणि चांदी या दोन्ही मौल्यवान धातूंच्या किमतीत मोठी घसरण झाली आहे. ताज्या दरांनुसार, सोन्याचा भाव 1.37 लाख रुपयांच्या आसपास आला आहे. विशेष म्हणजे, गेल्या दोन महिन्यांतील दरांची तुलना केली तर सोनं तब्बल 27 हजार रुपयांनी स्वस्त झालं आहे.
आकडेवारीनुसार, 24 कॅरेट शुद्ध सोन्याचा दर प्रति 10 ग्रॅम 1,37,520 रुपये झाला आहे. म्हणजेच एका ग्रॅमसाठी ग्राहकांना 13,752 रुपये मोजावे लागत आहेत. 1 नोव्हेंबरच्या तुलनेत सोन्याच्या दरात 2,530 रुपयांची घट झाली आहे. 25 ऑगस्ट रोजी हाच दर 1,64,000 रुपये होता. त्यामुळे अवघ्या दोन महिन्यांत सोन्याच्या किमतीत मोठी घसरण नोंदवण्यात आली आहे.
22 कॅरेट सोन्याच्या दरातही नरमाई दिसून आली. दागिने तयार करण्यासाठी प्रामुख्याने वापरल्या जाणाऱ्या या सोन्याचा भाव प्रति 10 ग्रॅम 1,25,990 रुपये, तर प्रति ग्रॅम 12,599 रुपये आहे. त्याचवेळी 18 कॅरेट सोन्याचा दर 1,03,160 रुपये आणि 14 कॅरेट सोन्याचा दर 80,463 रुपये प्रति 10 ग्रॅम नोंदवण्यात आला आहे.
सोन्याबरोबरच चांदीच्या दरातही घसरण झाली आहे. ताज्या दरानुसार, चांदीचा भाव प्रति किलो 1,80,000 रुपयांवर आला आहे. गेल्या 3 दिवसांत चांदी तब्बल 15 हजार रुपयांनी स्वस्त झाली आहे.
