पुरंदर, ता. 4 : शेतात खोदलेला मोठा खड्डा बुजविण्यावरून दोन कुटुंबांत जोरदार वाद होऊन त्याचे रूपांतर मारहाणीत झाले. यामध्ये एका महिलेसह दोघा भावांना काठीने तसेच लाथाबुक्क्यांनी मारहाण करून जखमी केल्याची घटना नाझरे कप (ता. पुरंदर) येथे घडली. याप्रकरणी राजश्री संजीव रांधवण आणि तिचा मुलगा प्रकाश संजीव रांधवण यांच्याविरोधात जेजुरी पोलीस ठाण्यात तक्रार दाखल करण्यात आली आहे.
याबाबत गणपत नामदेव रांधवण (वय 54, रा. नवीन वसाहत, कात्रज, पुणे; मूळ रा. नाझरे कप) यांनी पोलिसांत फिर्याद दिली आहे. पोलिसांनी दिलेल्या माहितीनुसार, गणपत रांधवण यांचे नाझरे कप येथे शेती असून, त्यांच्या शेतात संजीव दत्तात्रय रांधवण यांनी मोठा खड्डा केल्याची माहिती त्यांचे भाऊ संपत यांनी फोनवरून दिली. त्यानंतर 1 नोव्हेंबर रोजी गणपत हे भाऊ नवनाथ, संपत, त्यांच्या पत्नी आणि पुतण्यासह शेतात गेले. यावेळी खड्ड्याबाबत विचारणा केली असता संजीव यांची पत्नी राजश्री हिने संबंधित शेतजमीन आपली असल्याचे सांगत त्यांना जाब विचारण्यास विरोध केला.
दरम्यान, संबंधित जमीन यापूर्वीच खरेदी केली असून न्यायालयाचा आदेशही आपल्या बाजूने असल्याचे सांगत कुटुंबीयांनी जेसीबीच्या साह्याने खड्डा बुजविण्यास सुरुवात केली. यावरून राजश्री आणि तिचा मुलगा प्रकाश यांनी शिवीगाळ व दमदाटी सुरू केली. वाद वाढल्याने पोलिसांना 112 क्रमांकावर फोन करण्यात आला. पोलिसांनी घटनास्थळी येऊन दोन्ही बाजूंना पोलीस ठाण्यात तक्रार देण्यास सांगितले.
मात्र, पोलिस निघून गेल्यानंतर पुन्हा वादाला सुरुवात झाली. यावेळी भांडण सोडविण्यासाठी आलेल्या निर्मला संपत रांधवण यांचे केस धरून त्यांना खाली पाडण्यात आले. त्यानंतर काठीने दोन्ही खांद्यांवर मारहाण करण्यात आली. तसेच प्रकाश याने गणपत यांच्या उजव्या हाताच्या दंडावर काठीने मारहाण केली, तर संपत यांनाही हाताने व लाथाबुक्क्यांनी मारहाण केल्याचा आरोप फिर्यादीत करण्यात आला आहे.
यावेळी पुन्हा शेतात आल्यास जीवे मारण्याची धमकी दिल्याचेही तक्रारीत नमूद आहे. जखमींना जेजुरी ग्रामीण रुग्णालयात उपचारासाठी नेण्यात आले. त्यानंतर गणपत यांना पुढील तपासणीसाठी ससून रुग्णालयात पाठविण्यात आले. या प्रकरणी जेजुरी पोलीस पुढील तपास करीत आहेत.
