दौंड : मोबाईलवरून एका महिलेला व्हिडीओ कॉल का केला, अशी विचारणा केल्याचा राग मनात धरून पतीने पत्नीला लाकडी दांडक्याने बेदम मारहाण केल्याची घटना दौंड शहरातील वडारगल्ली येथे मंगळवारी (ता. 3) रात्री साडेनऊच्या सुमारास घडली. याप्रकरणी संतोष धर्माजी शिंदे (वय 47, रा. वडारगल्ली, दौंड) याच्याविरोधात दौंड पोलीस ठाण्यात गुन्हा दाखल करण्यात आला आहे. याप्रकरणी एका 40 वर्षीय विवाहितेने पोलिसांत फिर्याद दिली आहे.
पोलिसांनी दिलेल्या माहितीनुसार, फिर्यादी या घरी असताना त्यांचे पती संतोष यांनी मोबाईलवरून एका महिलेला व्हिडीओ कॉल केल्याचे त्यांच्या निदर्शनास आले. याबाबत त्यांनी पतीला विचारणा केली असता, ‘मी कोणालाही फोन करेन आणि कोणाशीही बोलेन, तुला काय करायचे आहे?’ असे म्हणत पतीने वाद घातला. तसेच पुन्हा विचारणा केल्यास जीवे मारण्याची धमकी दिल्याचा आरोप आहे.
यानंतर संतोष यांनी लाकडी दांडके घेऊन पत्नीच्या अंगावर धाव घेतली. फिर्यादी यांनी बाहेर जाण्याचा प्रयत्न केला असता, पतीने पाठीमागून त्यांच्या डोक्यावर आणि पाठीवर दांडक्याने मारहाण केली. यावेळी शिवीगाळही करण्यात आली. पतीच्या तावडीतून कशीबशी सुटका करून त्यांनी दौंड पोलीस ठाणे गाठले. वैद्यकीय तपासणी केल्यानंतर त्यांनी पोलिसांत तक्रार दाखल केली.
दरम्यान, या प्रकरणी दौंड पोलीस ठाण्यात भारतीय न्याय संहितेच्या कलम 118 (1), 351 (2) आणि 352 नुसार गुन्हा दाखल करण्यात आला आहे. पुढील तपास पोलीस हवालदार शेख करीत आहेत
