मुंबई: मुंबईजवळील विरार येथील एक धक्कादायक प्रकार समोर आला आहे. नुकत्याच घेण्यात आलेल्या 12 वीच्या परीक्षेच्या उत्तर पत्रिका सध्या शिक्षिका तपासात आहेत. दरम्यान, विरार येथील शिक्षिकेच्या घरी आग लागल्याने 12 वीच्या उत्तर पत्रिका जळून खाक झाल्या आहेत. हि घटना विरार पश्चिम गंगुबाई अपार्टमेंट बोलींज नानभाट रोड येथे घडली आहे. विरार येथील या महिला शिक्षकाने या उत्तरपत्रिका फेरपडताळणीसाठी आपल्या घरी आणल्या होत्या, अशी माहिती समोर आली आहे.
घरातील लोक घर बंद करुन बाहेर गेले होते. दरम्यान, घरामध्ये आग लागली आणि आगीमध्ये घरातील इतर सामान सोफ्यावर ठेवलेल्या उत्तरपत्रिकांसह जळून खाक झाले, आग लागण्याचे नेमके कारण अद्याप स्पष्ट होऊ शकले नाही. आग शॉर्ट सर्किट झाल्याने लागली असावी अशी माहिती प्राथमिक तपासात समोर आली आहे. महिला शिक्षकेकडे नेमक्या इयत्ता बारावीच्या कोणत्या शाखेच्या उत्तरपत्रिका तपासण्यास आल्या होत्या, याबाबत नेमकी माहिती पुढे आली नाही.
दरम्यान, उत्तरपत्रिका शाळेत जाऊनच तपासाव्या लागतात. परंतू अनेक शिक्षक या उत्तरपत्रिका घरी घेऊन जातात. या घटनेची चौकशी सध्या सुरु असून पुढे काय होणार हे पाहणे महत्वाचे ठरणार आहे.
