दिल्ली: राष्ट्रीय राजधानी दिल्लीमध्ये लाल किल्ल्याजवळ मोठा स्फोट झाल्याने खळबळ माजली आहे. मेट्रो स्टेशनच्या गेट क्रमांक 1 जवळ उभ्या असलेल्या एका कारमध्ये हा शक्तिशाली स्फोट झाला. या दुर्घटनेत 8 लोकांचा बळी गेला, तर गंभीर जखमी झालेल्यांची संख्या सुमारे 24 आहे. स्फोटाचा तपास सुरू असला तरी, जखमींची भीषण अवस्था पाहता, बळींची संख्या वाढण्याची दाट शक्यता आहे. दिल्लीतील या घटनेकडे दहशतवादी हल्ला म्हणून पाहिले जात आहे. मात्र, अद्याप कोणत्याही दहशतवादी संघटनेने या हल्ल्याची जबाबदारी घेतलेली नाही.
स्फोटाचे ‘पुलवामा कनेक्शन’
या स्फोटात वापरण्यात आलेल्या कारची माहिती तपास यंत्रणांनी काढली असता, धक्कादायक पुलवामा कनेक्शन समोर आले आहे. ही कार (I20) ज्या शेवटच्या व्यक्तीला विकण्यात आली होती, तो तारिक हा जम्मू-काश्मीरच्या पुलवामाचा रहिवासी आहे.
कार बेकायदेशीरपणे विकली
स्फोटात वापरण्यात आलेल्या I20 कारची खरेदी-विक्री साखळी तपास यंत्रणांना संशयास्पद वाटत आहे. ही कार 2014 पासून आतापर्यंत 4 मालकांकडून विकत घेतली गेली आहे. सर्वात आधी सलमान नावाच्या व्यक्तीने 18 मार्च 2014 रोजी ही कार खरेदी केली. त्यानंतर, ही कार देवेंद्र, सोनू आणि शेवटी तारिक यांच्यापर्यंत पोहोचली. धक्कादायक बाब म्हणजे, एकदाही या कारची मालकी अधिकृत कागदपत्रांमध्ये बदलली गेली नव्हती; हा संपूर्ण व्यवहार बेकायदेशीर पद्धतीने करण्यात आला होता.
सीसीटीव्ही फुटेजमधून मार्ग स्पष्ट:
तपास यंत्रणांनी आतापर्यंत 50 पेक्षा जास्त सीसीटीव्ही कॅमेऱ्यांचे फुटेज बारकाईने तपासले आहे. महत्त्वाच्या मार्गांवरून फिरत ही कार शेवटी लाल किल्ल्याच्या परिसरात पोहोचली. दरम्यान, या प्रकरणी राजधानी दिल्लीत झालेल्या स्फोटानंतर जम्मू आणि काश्मीर पोलिसांनी अमीर आणि उमर या दोन भावांना पुलवामा येथून ताब्यात घेतल्याची माहिती मिळत आहे. त्यांना ताब्यात घेऊन श्रीनगरला आणण्यात आले असून अधिक चौकशी केली जात आहे.
