बंगळुरू: चॉकलेट खाल्ल्यानंतर 23 वर्षीय तरुणीचा अचानक मृत्यू झाल्याची धक्कादायक घटना समोर आली आहे. ही घटना कर्नाटकातील हसन जिल्ह्यातील सकलेशपूर परिसरात घडली. तरुणीचा मृत्यू नेमका कोणत्या कारणामुळे झाला, याचा तपास पोलिसांकडून सुरू आहे.
मिळालेल्या माहितीनुसार, वर्षा नावाची तरुणी काही दिवसांपूर्वी फिरण्यासाठी बाहेर गेली होती. ती एका लॉजमध्ये थांबली होती. तेथे तिने चॉकलेट खाल्ल्यानंतर काही वेळाने आंघोळीसाठी जाण्याची तयारी केली. मात्र, बाथरूममध्ये गेल्यानंतर ती अचानक खाली कोसळली. उपस्थितांनी तिला शुद्धीवर आणण्याचा प्रयत्न केला, परंतु तिचा मृत्यू झाला.
या घटनेची माहिती मिळताच सकलेशपूर ग्रामीण पोलिसांचे पथक घटनास्थळी पोहोचले. पोलिसांनी मृतदेह ताब्यात घेऊन शवविच्छेदनासाठी पाठवला आहे. प्राथमिक माहितीनुसार, तरुणीच्या शरीरावर कोणत्याही प्रकारच्या बाह्य दुखापतीच्या खुणा आढळलेल्या नाहीत. त्यामुळे तिच्या अचानक झालेल्या मृत्यूमागील कारणाबाबत सध्या अनेक प्रश्न उपस्थित झाले आहेत.
घटनेच्या वेळी वर्षासोबत लॉजमध्ये तिचा चुलत भाऊ आणि मैत्रीणही असल्याचे सांगण्यात येत आहे. पोलिसांनी दोघांची चौकशी सुरू केली आहे. दरम्यान, सकलेशपूर ग्रामीण पोलीस ठाण्यात या प्रकरणी अनैसर्गिक मृत्यूची नोंद करण्यात आली आहे. शवविच्छेदन अहवाल आल्यानंतर मृत्यूचे नेमके कारण स्पष्ट होण्याची शक्यता आहे.
